ముంబై దాడి హీరో హేమంత్ భార్య కన్నుమూత

Posted: 09/29/2014 05:41 PM IST

ముంబై దాడుల వార్త గుర్తుకు రాగానే ఒళ్ళు గగుర్పొడిచే ఉగ్రవాదుల దాడి ఒకవైపు ఉంటే మరొక వైపు వారిని ఎదుర్కున్న హేమంత్ కర్కరే ఉంటారు. 26/11 దాడుల్లో ఉగ్రవాదులు దేశ ఆర్ధిక రాజధానిపై విరుచుకుపడి... ప్రజలను పిట్టలను కాల్చినట్లు కాలుస్తుంటే.., వారికి ఎదురు వెళ్లి పోరాడిన మొనగాడు హేమంత్ కర్కరే. దాడుల సమయంలో మహారాష్ర్ట ఏటీఎస్ ( యాంటి టెర్రరిస్ట్ స్క్వాడ్) చీఫ్ గా ఉన్న హేమంత్.., ఉగ్రవాదుల దాడుల విషయం తెలుసుకున అలర్టయ్యారు. తన టీంతో పాటు ఉగ్రవాదులకు ఎదురెళ్లి పోరాడారు.

పదిమంది ఉగ్రవాదులను ఒక్కరే ఎదుర్కుని పోరాడారు. వారిలో కొంతమందిని మట్టుబెట్టగా... ముష్కరులు జరిపిన తూటాల దాడికి బలయ్యారు. ఈ భీకర దాడిలో భారత సైన్యానికి స్పూర్తిగా.. దేశ ప్రజలకు హీరోగా నిలిచింది హేమంత్ కర్కరే. అలాంటి అమరవీరుడి భార్య కవిత కర్కరే ఇక లేరు. సోమవారం మధ్యాహ్నం ముంబైలోని హిందుజా ఆస్పత్రిలో కవిత తుదిశ్వాస విడిచారు. బ్రెయిన్ హేమరేజ్ తో బాధపడుతున్న కవిత... రెండ్రోజుల క్రితం ఆస్పత్రిలో అడ్మిట్ అయ్యారు. అప్పటికి ఆమె పరిస్థితి విషమంగా ఉన్నట్లు వైద్యులు తెలిపారు. సోమవారం మధ్యాహ్నం తర్వాత ఆమె బ్రెయిన్ డెడ్ కారణంగా చనిపోయింది అని దృవీకరించారు. కవిత-హేమంత్ దంపతులకు జూయి, సయాలి అనే ఇద్దరు కూతుళ్లతో పాటు ఆకాశ్ అనే కొడుకు కూడా ఉన్నారు.

భర్త నేర్పిన ప్రజా సేవ, ఇతరులకు మంచి చేయాలనే గుణంను చనిపోయాక కూడా కవిత చాటింది. ఆమె శరీరంలో ఉపయోగపడే కాలేయం, కళ్లు, చర్మం, మూత్రపిండాలు ఇలా పనికివచ్చే ప్రతి భాగాన్ని దానం చేసేందుకు కుటుంబ సభ్యులు అంగీకరించారు. తన భర్త చనిపోవటానికి సరైన రక్షణా కవచాలు ( బుల్లెట్ ప్రూఫ్ జాకెట్లు) లేకపోవటమే కారణమని కవిత ఆరోపించారు. మిగతా సిబ్బందికి అవి ఇచ్చి వారినైనా కాపాడాలని విజ్ఞప్తి చేశారు. వీరుని భార్య ఆత్మకు శాంతి కలగాలని కోరుకుందాం.

కార్తిక్