అలిపిరి కేసులో దోషులకు నాలుగేళ్లు జైలు

Posted: 09/25/2014 03:23 PM IST

4 year jail for three in alipiri bomb blast case

రాష్ట్ర వ్యాప్తంగా పెను సంచలనం రేకెత్తించిన అలిపిరి బాంబు ఘటన కేసులో ముగ్గురునిందితులకు న్యాయస్థానం శిక్షను ఖరారు చేసింది. ముఖ్యమంత్రి చంద్రబాబు టార్గెట్ గా జరిగిన అలిపిరి బాంబు దాడి కేసులోని ముగ్గురు దోషులకు నాలుగేళ్ల జైలు శిక్షతో పాటు రూ.500 జరిమానాను విధిస్తూ తీర్పు వెల్లడించింది. 2003 అక్టోబర్‌లో అప్పటి ఉమ్మడి రాష్ట్ర ముఖ్యమంత్రి చంద్రబాబు లక్ష్యంగా చేసుకుని తిరుపతి సమీపంలో అలిపిరి వద్ద నక్సల్స్‌ దాడికి ఒడిగట్టారు.

ఈ కేసులో నిందితులు రామ్మోహన్‌రెడ్డి, నరసింహారెడ్డి అలియాస్ రాజశేఖర్, ఎం.చంద్ర అలియాస్ కేశవులును దోషులగా నిర్థారిస్తూ న్యాయస్థానం ఈ శిక్షలు ఖరారు చేసింది. తిరుమల స్వామివారికి పట్టువస్త్రాలు సమర్పించేందుకు వెళుతున్న బాబుపై ఈ దాడి జరిగింది. అయితే తామిప్పడు మావోయిస్టు కార్యకలాపాల్లో లేమని, ఎప్పుడో జనజీవన స్రవంతిలో కలిసిపోయామని దోషులు కోర్టుకు విన్నవించుకున్నారు. తమ వాదనను కోర్టు వినిపించుకోలేదని ఈ తరుణంలో కోర్టు తీర్పును సవాల్ చేస్తూ ఉన్నత న్యాయస్థానాన్ని ఆశ్రయించనున్నట్లు దోషులు నర్సింహారెడ్డి, రామ్మోహన్ రెడ్డి, కేశవ్ తెలిపారు.

జి. మనోహర్