బొత్సా.. ఏమిటీ నీ వరుస...

Posted: 09/24/2014 01:35 PM IST

అధికారంలో వుండగా మంచి అనుకున్న పనులు కాస్తా.. ప్రతిపక్షంలోకి రాగానే చెడుగా మారిపోతున్నయి. అర్థమైనట్టు లేదు కదూ.. మీకు మరింత క్లారిటీ కావాలా.. అధికారంలో వుండగా, సబ్సీడీ వంట గ్యాస్ సిలిండర్ ను ఆధార్ తో అనుసంధానం చేసి వినియోగదారులను ముప్పతిప్పలు పెట్టిన కాంగ్రెస్ ప్రభుత్వం.. ఇప్పడు ప్రతిపక్షంలోకి రాగానే ఆధార్ తో లింకు పెట్టిన పథకాలపై కస్సు మంటోంది. రేషన్కార్డుల జారీకి ఆధార్ తో లింక్ పెట్టడం సరికాదని మాజీ మంత్రి బొత్స సత్యనారాయణ విమర్శించారు. ప్రతిపక్షంలో ఉన్నప్పుడు చంద్రబాబు సంక్షేమ పథకాలకు ఆధార్ లింక్ ఉండకూడదన్నారని ఆయన గుర్తు చేశారు.

ముఖ్యమంత్రి అయ్యాక సంక్షేమ పథకాలకు ఆధార్ లింక్ చేస్తున్నారని, ఇది చంద్రబాబు మాట మార్చే వైఖరికి నిదర్శనమని బొత్స సత్యనారాయణ ఘాటు వ్యాఖ్యాలు చేశారు. మరి అధికారంలో వుండగా వారు చేసిన పనులను ఆయన మర్చిపోయారు. సబ్సీడీ వంట గ్యాస్ సిలిండర్ ను ఆధార్ తో లింక్ చేసినప్పుడు.. ఈ విషయాన్ని ఆయన మర్చిపోయారు. దీంతో బొత్సా.. ఏమిటీ నీ వరుస అంటూ పలువురు కాంగ్రెస్ కార్యకర్తలే గుసగుసలాడుతున్నారు.

జి మనోహర్