అంతా చూస్తుండగా వేటకొడవళ్లతో దాడి

Posted: 09/11/2014 09:48 AM IST

నల్గొండ జిల్లాలో దారుణం జరిగింది. పట్టపగలే వేటకొడవళ్లతో హత్యాయత్నం చేసిన ఘటన జిల్లాలో కలకలం రేపింది. వక్ఫ్ భూ సంరక్షకుడిపై ఓ వ్యక్తి అనుచరులు వేటకొడవళ్ళతో దాడిచేయగా అతను తీవ్రగాయాలపాలయ్యాడు. జిల్లాలోని కొండమండుగు గ్రామానికి చెందిన సయ్యద్ స్థానిక వక్ఫ్ భూముల సంరక్షకుడుగా ఉన్నాడు. గ్రమాంలో భూముల విషయంలో దగ్గరి బంధువైన మక్బూల్ తో విభేదాలు తలెత్తాయి. దీంతో సయ్యద్ పై మక్బూల్ కక్ష్య పెంచుకున్నాడు.

కొద్దికాలంగా హైదరాబాద్ లోని రెయిన్ బజార్ లో ఉంటున్న సయ్యద్, బుధవారం గ్రామానికి వచ్చాడు. విషయం తెలుసుకున్న మక్బూల్ భూమి విషయమై మళ్లీ గొడవపడ్డాడు. ఊరినుంచి తిరిగి వెళ్తూ జాతీయ రహదారపై ఉన్న హోటల్ లో సయ్యద్ బోజనం చేస్తుండగా.., ఒక్కసారిగా మక్భూల్ అనుచరులు వేటకొడవళ్ళతో దాడి చేశారు. దీంతో సయ్యద్ పెద్దగా కేకలు పెట్టాడు. ఇది గమనించిన హోటల్ సిబ్బంది, ఇతరులు అప్రమత్తం కావటంతో దుండగులు పారిపోయారు. అంబులెన్స్ కు ఫోన్ చేసిన స్థానికులు సయ్యద్ ను ఆస్పత్రికి తరలించారు. బాధితుడి పరిస్థితి విషమంగా ఉంది. ఘటనపై కేసు నమోదు చేసుకున్న పోలిసులు విచారణ చేపట్టారు. మరోవైపు సయ్యద్ పై హత్యాయత్నం చేసినట్లు బీబీనగర్ పోలిస్ స్టేషన్ కు మక్బూల్ స్వయంగా వచ్చి లొంగిపోయాడు.

 

కార్తిక్