వణికిన దీవులు.. దేవుడా! అంటూ ప్రజల పరుగులు

Posted: 09/10/2014 05:34 PM IST

భారీ భూకంపం ఇండోనేషియాను వణికించింది. బుధవారం తూర్పు తీరంలో భూమి కంపించిది. రిక్టర్ స్కేలుపై దీని తీవ్రత 6.5గా నమోదయింది. సులవేశి ద్వీపంలో సంభవించిన భూకంపం పట్ల అధికారులు అప్రమత్తం అయ్యారు. సముద్రతీరంలో భూమి కంపించటంతో సునామి వస్తుందని అంతా భయపడ్డారు. అయితే ఎలాంటి సునామి హెచ్చరికలు నమోదు కాలేదని ఇండోనేషియా ఉన్నతాధికారులు తెలిపారు. సులవేశిలోని ద్వీపంలోని మండేయాంగ్ ప్రాంతంలో భూమిలో 22కిలోమీటర్ల లోపల భూకంప కేంద్రాన్ని గుర్తించారు.

ప్రకంపణలతో వణికిపోయిన ఇండోనేషియా ప్రజలు ఇళ్లనుంచి బయటకు పరుగులు తీశారు. అటు కార్యాలయాల్లో కూడా ప్రకంపణలు రావటంతో ప్రాణాలు కాపాడుకునేందుకు ఉద్యోగులంతా రోడ్లపైకి పరుగులు మొదలు పెట్టారు. కొద్దిసేపు ఏం జరుగుతుందో తెలియని వాతావరణం నెలకొంది. తరుచుగా భూ కంపాలు సంభవించే ప్రాంతమే అయినా.., ప్రకంపనాల తీవ్రత ఎక్కువగా ఉండటంతో అంతా భయపడ్డారు. అయితే సునామి హెచ్చరికలు లేకపోవటంతో అంతా ఊపిరిపీల్చుకున్నారు. 2004సంవత్సరం డిసెంబర్ చివరి వారంలో సముద్రంలో వచ్చిన భారీ భూకంపం సునామిలా మారి పన్నెండు దేశాలను అతలాకుతలం చేసింది. ప్రకృతి కన్నెర్రజేస్తే 2,30,000మంది ప్రజలు బలయ్యారు. పదేళ్ళవుతున్నా నాటి దుర్ఘటనను ఇంకా ఎవరూ మరువేలకపోతున్నారు.

కార్తిక్