బెజవాడలో అద్దె ఇళ్లు వెతుకుతున్న చంద్రబాబు

Posted: 09/09/2014 04:14 PM IST

ఏపీ ముఖ్యమంత్రి చంద్రబాబు అద్దె ఇళ్ళు కోసం విజయవాడలో వెతుకులాట ప్రారంభించారు. బాబు ఉండే ఇంటి కోసం ఏపీ ప్రభుత్వ అధికారులు విజయవాడలో భవనాలను పరిశీలిస్తున్నారు. ప్రస్తుతం హైదరాబాద్ జూబ్లిహిల్స్ లో చంద్రబాబు ఉంటున్నారు. అయితే ఆంధ్రప్రదేశ్ రాజధాని విజయవాడకు త్వరలోనే ప్రభుత్వ కార్యాలయాలు తరలిపోనున్నాయి. ఈ నేపథ్యంలో చంద్రబాబు కొద్ది రోజుల పాటు హైదరాబాద్ లో కొద్ది రోజుల పాటు ఉండేలా ప్లాన్ చేసుకుంటున్నారు. బెజవాడకు వచ్చినపుడు నగరంలో కూడా తాత్కాలిక క్యాంపు కార్యాలయం ఉండాలని బావిస్తున్నారు.

విజయవాడలో ప్రస్తుతం బాబుకు ఇళ్లు లేదు. అంతేకాకుండా చిన్నపాటి గెస్ట్ హౌజులు తప్ప క్యాంపు కార్యాలయం స్థాయిలో ప్రభుత్వ భవనాలు కూడా నగరంలో లేవు. దీంతో చంద్రబాబు కోసం ఇళ్లు వెతికే పనిలో ఏపీ అధికారులు ఉన్నారు. ముఖ్యమంత్రి ఉండేందుకు విశాలమైన భవనంతో పాటు.., సమీక్షలు, సమావేశాల వంటి ప్రభుత్వ కార్యక్రమాలు నడిపేందుకు అదే విధంగా సాధారణ ప్రజలు వచ్చి కలిసేందుకు వీలుగా ఉండే భవనం కోసం వెతుకుతున్నారు. పెద్ద భవనంతో పాటు భద్రతా పరమైన అంశాలను పరిగణలోకి తీసుకుని పలు భవనాలను పరిశీలిస్తున్నారు.

ఇప్పటికే చంద్రబాబుకు ఓ భవనం కూడా చూపించటానికి సిద్దం చేశారని తెలుస్తోంది. భద్రతా వ్యవహారాలు, వాస్తు అన్ని కుదిరితే అదే ఖాయమయ్యే అవకాశాలు కన్పిస్తున్నాయి. రాజధాని విజయవాడకు మారుతుండటంతో నగరంలో ఇండ్ల అద్దె రేట్లు ఒక్కసారిగా పెరిగాయి. కొన్ని చోట్ల ఏకంగా రెట్టింపయ్యాయి. అయితే ముఖ్యమంత్రి కోసం డబ్బు ఖర్చు చేయటం ప్రభుత్వానికి పెద్ద విషయమేం కాదనుకోండి. మొత్తానికి రాజధానిలో ఇంటికోసం చంద్రబాబు వెతుకులాటలో పడ్డారన్నమాట

కార్తిక్