ఖైరతాబాద్ గణేషుడి యాత్ర నిలిపేసిన పోలిసులు

Posted: 09/09/2014 09:32 AM IST

ఖైరతాబాద్ మహా గణేషుడి శోభాయాత్ర కార్యక్రమం నిలిచిపోయింది. నిమజ్జనం ఆలస్యం అవుతుందని భావించిన ఉత్సవ కమిటీ యాత్రను నిలిపివేసింది. అర్ధరాత్రి రెండు గంటల తర్వాత ఖైరతాబాద్ వినాయకుడిని వాహనంపైకి భారీ క్రేన్ సాయంతో చేర్చారు. అనంతరం వెల్డింగ్ పనులు పూర్తి చేశారు. అప్పటికే సమయం తెల్లవారుజామున మూడు గంటలు దాటింది. ఆ సమయంలో శోభాయాత్ర ప్రారంభించటానికి ఉత్సవ కమిటీ ఏర్పాట్లు చేసుకుంది. అయితే పోలిసులు ఆ సమయంలో శోభాయాత్ర చేసేందుకు అనుమతివ్వలేదు.

మూడు గంటల తర్వాత శోభాయాత్ర ప్రారంభం అయితే ఉదయం దాదాపు పది గంటలు దాటాక యాత్ర పూర్తవుతుందని భావించారు. దీంతో కార్యాలయాలకు వెళ్లేవారికి తీవ్ర ఇబ్బందులు తప్పవని శోభాయాత్రకు అనుమతివ్వటంలేదని తేల్చి చెప్పారు. దీంతో శోభాయాత్రను ఉదయం వరకు నిర్వహించలేదు. యాత్రను చూడటానికి దూర ప్రాంతాల నుంచి వచ్చిన భక్తులు పోలీసుల తీరు వల్ల తీవ్ర నిరాశ చెందారు. అనుమతి లేకపోవటంతో చేసేదేమి లేదని ఖైరతాబాద్ ఉత్సవ కమిటీ నిర్వాహకులు చెప్తున్నారు.

ఖైరతాబాద్ నుంచి చంద్ విహార్ హోటల్, సెన్సేషన్ సినిమా థియేటర్, రాజ్ దూత్ హోటల్, సచివాలయం గేట్ 1, తెలుగుతల్లి ఫ్లై ఓవర్ నుంచి ట్యాంక్ బండ్ కు శోభాయాత్ర చేరుకుంటుంది. గతంలో ప్రతిసారి అర్ధరాత్రి యాత్ర ప్రారంభమై...తెల్లవారుజాము వరకు యాత్ర పూర్తయ్యేది. అయితే ఈ సారి సామాన్య ప్రజల సౌకర్యార్దం వినాయకుడే తన నిమజ్జనంను కాసేపు వాయిదా వేసుకున్నాడు.

 

కార్తిక్