క్యూ కట్టిన గణపయ్యలు

Posted: 09/08/2014 08:11 AM IST

నిమజ్జనం కోసం గణపయ్యలు తరలుతున్నారు. నవరాత్రులు భక్తుల పూజలందుకున్న వినాయకులు ఇక సెలవంటూ నిమజ్జనంకు సిద్ధమవుతున్నారు. భాగ్యనగరంలో ఎక్కడ చూసినా వినాయకుల కోలాహలం కన్పిస్తోంది. నిమజ్జనం కోసం ట్యాంక్ బండ్ కు రాత్రి నుంచి గణపయ్యలు క్యూ కట్టారు. ఉదయమే ట్యాంక్ బండ్ పై ఎక్కడ చూసినా వినాయక విగ్రహాలే కన్పిస్తున్నాయి. సాగర్ లో నిమజ్జనం కోసం చక్కగా చూడముచ్చటగా గణపయ్యలు క్యూ కట్టారు. భక్తులకు వీడ్కోలు పలుకుతూ క్రేన్ ఎక్కి గంగమ్మ ఒడికి చేరుతున్నారు.

హైదరాబాద్ లో నిమజ్జనంకు అన్ని ఏర్పాట్లు పూర్తయ్యాయి. తెలంగాణ ప్రభుత్వం తొలిసారి ఉత్సవం నిర్వహిస్తుండటంతో ప్రతిష్టాత్మకంగా ఏర్పాట్లు చేసంది. హుస్సేన్ సాగర్ లో ఇరవై వేలకు పైగా విగ్రహాలు నిమజ్జనం అవుతాయని అంచనా వేస్తున్నారు. ఇందుకు తగ్గట్లు సాగర్ చుట్టూ క్రేన్లను సిద్దం చేశారు. ఇక ట్యాంక్ బండ్ తో పాటు మినీ ట్యాంక్ బండ్ గా పిలిచే సరూర్ నగర్ చెరువు, నగరంలోని ఇతర చెరువులు, శివార్లలోని చెరువుల్లో కూడా నిమజ్జనంకు ఏర్పాట్లు చేశారు. ఎప్పటికప్పుడు చెత్త తరలింపు కోసం జీహెచ్ ఎంసీ అదనపు వాహనాలను ట్యాంక్ బండ్ పరిసరాల్లో ఉంచింది. అటు పారిశుధ్య కార్మికులు కూడా రాత్రింబవళ్లు చెత్తను తరలిస్తున్నారు.

ఇక నిమజ్జనం సందర్బంగా పోలిసులు పటిష్ట బందోబస్తు ఏర్పాట్లు చేశారు. ఈ దఫా భక్తుల రద్దీని దృష్టిలో ఉంచుకుని బందోబస్తును మరింత పెంచినట్లు పోలిసులు తెలిపారు. ప్రధాన కూడళ్లలో సీసీ కెమెరాలతో పాటు.., మఫ్టీలో ప్రత్యేక పోలిసు బృందాలను రంగంలోకి దించారు. సాధారణ పోలిసులతో పాటు.., అదనపు రిజర్వు బలగాలను కూడా బందోబస్తు కోసం వినియోగిస్తున్నారు. అనుమానితులపై గట్టి నిఘా పెట్టినట్లు పోలిస్ ఉన్నతాధికారులు తెలిపారు. బాంబ్ స్క్వాడ్, డాగ్ స్క్వాడ్ బృందాలను అందుబాటులో ఉంచారు.

 

కార్తిక్