ఏపీ ఎక్స్ ప్రెస్ రూటు మార్పు

Posted: 09/02/2014 10:20 AM IST

విభజన ప్రభావం రైళ్ళపై కూడా పడింది. తెలంగాణలో ఆంధ్రప్రదేశ్ అనే పేరు వినబడకుండా చేస్తున్న కేసీఆర్.., ఏ అంశాన్ని వదలటం లేదు. చివరకు రైళ్ల పేర్లను కూడా మార్చాలని ఆయన ప్రభుత్వం నిర్ణయించుకుంది. హైదరాబాద్ -

ఢిల్లీ మద్య ఇంతకాలం ఏపీ ఎక్స్ ప్రెస్ నడిచేది. అయితే ఇటీవలి రైల్వే బడ్జెట్ లో విజయవాడ - ఢిల్లీ మద్య కొత్త రైలును కేంద్రం కేటాయించింది. ఈ రైలుకు ఏపీ ఎక్స్ ప్రెస్ అని పేరు పెట్టాలని ఆ రాష్ర్ట ప్రభుత్వం భావిస్తోంది. ఈ నేపథ్యంలో ఇప్పటికే ఉన్న ఏపీ ఎక్స్ ప్రెస్ పేరు మార్చాలని దక్షిణ మద్య రైల్వే కేంద్ర రైల్వే బోర్డుకు ప్రతిపాదనలు పంపింది.

ఏపీ ఎక్స్ ప్రెస్ (12723/12724) తెలంగాణ ఎక్స్ ప్రెస్ గా మారుస్తారని ఊహాగానాలు విన్పిస్తున్నాయి. అయితే సికింద్రాబాద్ - కాగజ్ నగర్ మద్య ఇప్పటికే తెలంగాణ ఎక్స్ ప్రెస్ (17035) పేరుతో ఒక రైలు నడుస్తోంది. పేరు మార్పునేపథ్యంలో కాగజ్ నగర్ కు వెళ్ళే రైలుకు మరో పేరు పెట్టి... ఏపీ ఎక్స్ ప్రెస్ కు తెలంగాణ ఎక్స్ ప్రెస్ గా పేరు మార్చాలని తెలంగాణ మంత్రులు భావిస్తున్నారు. ఈ విషయాన్ని సీఎం కేసీఆర్ కు కూడా సూచించారు.

తెలంగాణ పేరుకు పాపులారిటీ, బ్రాండింగ్ తేవాలనుకుంటున్న కేసీఆర్.., ఢిల్లీకి వెళ్లే రైలు పేరు మార్పుకు అంగీకరించినట్లు తెలుస్తోంది. తెలంగాణ ఎక్స్ ప్రెస్ పేరుపై రైలు నడిస్తే.., ఆ రైలు మార్గంలో ఉన్న రాష్ర్టాలన్నిటిలో, రైలు ఎక్కేవారిలో తెలంగాణ పేరు నానుతుందని ఆలోచిస్తున్నారు. ఈ ప్రతిపాదనకు ఆమోదం తెలిపి.., రైల్వే బోర్డుకు లేఖ రాస్తే పేరు మారిపోనుంది. ఇక ఏపీ ఎక్స్ ప్రెస్ త్వరలో రూటు మార్చుకుని విజయవాడ నుంచి ఢిల్లీకి పరుగులు తీస్తుంది.

 

కార్తిక్