ఇప్పుడిక రైస్ బకెట్ చాలెంజ్

Posted: 08/24/2014 06:10 PM IST

ప్రపంచ వ్యాప్తంగా అంతా ఐస్ బకెట్ చాలెంజ్ ఫీవర్ నడుస్తోంది. అయితే హైదరాబాద్ లో ప్రారంభమైన రైస్ బకెట్ చాలెంజ్ దీనికి ధీటైన పోటి ఇస్తోంది. ఒక తెలుగు మహిళ ప్రారంభించిన ఈ ఛాలెంజ్ పోటి సోషల్ మీడియాలో హల్ చల్ సృష్టిస్తోంది. పేదలకు తిండి పెట్టాలనే సదుద్దేశంతో ప్రారంభమైన ఈ చాలెంజ్ కు మంచి స్పందన వస్తోంది. పేదలకు ఎవరైతే అన్నం పెట్టాలి అనుకుంటున్నారో వారు రైస్ బకెట్ చాలెంజ్ లో పాల్గొనవచ్చు అని చెప్తున్నారు చాలెంజ్ సృష్టికర్త మంజు లతా కళానిధి. సోషల్ మీడియా ద్వారా సామాజిక ఉద్యమాన్ని ప్రారంభిచిన మంజు.., తన వంతుగా బియ్యాన్ని పంపిణీ చేసి ఫేస్ బుక్ లో ప్రపంచానికి సవాల్ విసిరింది. మీరు చేసి చూపించండి అని ఛాలెంజ్ చేస్తుంది.

మంజు పిలుపుకు మంచి స్పందన వస్తోంది. ఎంతోమంది దానగుణం కలిగిన వారు రైస్ బకెట్ చాలెంజ్ లో పాల్గొని వారికి తోచినంత సాయం చేస్తున్నారు. డబ్బు, బియ్యం రూపంలో మంజు నిధికి పంపుతున్నారు. పేదలకు కడుపు నిండా అన్నం పెట్టడంతో పాటు వారికి వచ్చే రోగాలకు మందులు సమకూర్చడమే తన ఉద్దేశ్యం అని మంజు లతా చెప్తున్నారు. రోజూ ఎంతోమంది పేదలు కడుపు కాలి కాలం వెల్లదీస్తున్నారు. వారికి కనీస అవసరమైన తిండిని మనం అందించగలిగితే చాలు అని చెప్తుందామె.

సొంతంగా ఆహారం తయారు చేసి కానీ.., కొని అయినా సరే రైస్ బకెట్ చాలెంజ్ లోపాల్గొనవచ్చని చెప్తోంది. అయితే రోగులకు సాయం చేయాలనుకుంటే మాత్రం ఒక్కొక్కరూ రూ. 100కి తక్కువ కాకుండా సాయం చేయవచ్చని చెప్తోంది. తనతో కలిసి వచ్చే చేతులను బట్టే మనలో ఎంతమందికి సామాజిక స్పృహ ఉందో అర్ధం చేసుకోవచ్చని సవాల్ విసురుతోంది. ఇప్పటికే సోషల్ మీడియాలో విశేష ఆదరణ పొందిన ఈ ఉద్యమం.., మరింత విస్తరించి పేదరికాన్ని నిర్మూలించాలని కోరుకుందాం. ఆల్ ది బెస్ట్ రైస్ బకెట్ చాలెంజర్స్.

 

కార్తిక్