వేధింపులతో జూనియర్ ఆర్టిస్ట్ ఆత్మహత్య

Posted: 08/22/2014 09:14 AM IST

 

భర్త వేధింపులు, పైశాచికత్వం భార్య ప్రాణాన్ని బలిగొన్నాయి. కట్టుకున్నవాడే చివరకు కాలయముడయ్యాడు. భర్త వేధింపులు భరించలేక ఓ జూనియర్ ఆర్టిస్ట్ ఆత్మహత్యకు పాల్పడింది. నిషా అనే మహిళ సినిమాల్లో జూనియర్ ఆర్టిస్ట్ గా పనిచేస్తుంటుంది. కిషన్ అలియాస్ సమీర్ అనే వ్యక్తి నిషాను ప్రేమించి పెళ్ళి చేసుకున్నాడు. వీరిద్దరూ అంబేడ్కర్ నగర్ లో ఉండేవారు. పెళ్ళయినప్పటి నుంచి నిషాను కిషన్ వేధించటం మొదలు పెట్టాడు. భర్త వేధింపులు కొన్నాళ్లు మౌనంగా భరించిన బాధితురాలు.., ఓ సారి మనో వేదనతో విషం తాగి ఆత్మహత్యకు కూడా పాల్పడింది. అయితే ఆ సమయంలో వెంటనే హాస్పిటల్ కు తీసుకెళ్ళటంతో ప్రాణాలతో బయటపడింది.

 

ఇంత జరిగినా బుద్ది మారని కిషన్.., మళ్ళీ వేధించటం మొదలు పెట్టాడు. సూటి పోటి మాటలతో చిత్రహింస పెట్టేవాడని స్థానికులు తెలిపారు. భర్త ప్రవర్తనలో మార్పు లేకపోవటంతో.., తీవ్ర మనస్తాపం చెందిన నిషా.., ఇక తను బతికున్నా ప్రయోజనం లేదనుకుని కిరోసిన్ పోసుకుని నిప్పంటించుకుంది. గాంధీ ఆస్పత్రికి తరలిస్తుండగా మార్గ మద్యలో మృతి చెందింది. ఈ ఘటనపై పోలిసులు కేసు నమోదు చేసుకున్నారు. భార్యను వేదించి ప్రాణాలను బలిగొన్న భర్తపై కేసు నమోదు చేసినట్లు తుకారాంగేట్ పోలిసులు వెల్లడించారు. ప్రాణంగా ప్రేమించిన వ్యక్తి ఆమె ప్రాణాలు పోయేలా ప్రవర్తిస్తాడని బాధితురాలు ముందు ఊహించలేదు. తెలిసుంటే ఇలా కాలయముడిని కట్టుకుని.., జీవితాన్ని బుగ్గి చేసుకునేది కాదు. లవ్ ఈజ్ బ్లైండ్ అంటే ఇదేనేమో.

 

 

కార్తిక్