టీడీపీ ఛాంబర్ పై తృణముల్ దాడి

Posted: 08/12/2014 03:44 PM IST

ఒక కుటుంబంలో అందరూ ఒకే విధంగా ఉంటారో లేదో ఖచ్చితంగా చెప్పలేము. తృణముల్ కాంగ్రెస్ పార్టీలో మాత్రం దాదాపు నేతలంతా ఒకే విధంగా ఉంటారు. ఇంకా చెప్పాలంటే ఒకరిని మించి మరొకరు అన్నట్లుంటారు. నాలుకలు కోస్తామని హెచ్చరించటంలోనే కాదు ప్రదానిని వంగోబెట్టి కొడతామని మాట్లాడటం అంటే వారివల్లే అవుతుంది. ఎందుకంటే వారంతా తృణముల్ కాంగ్రెస్ నేతలు. బెంగాల్ దీదీ వారిని అలా ట్రైన్ చేసి పంపుతుంది. మాటలతోనే బెదిరించటం లేదంటే చేతల్లో చూపించటం వారికి జెండా కర్రతో పెట్టిన విద్య. వీరితో వేగలేక కమ్యూనిస్టులే కామ్ గా ఉన్నారంటే వీళ్ళేంటో అర్ధమవుతుంది. అలాంటి వారి కన్ను ఇప్పుడు టిడిపి ఆఫీస్ పై పడింది.

పార్లమెంటులోని టిడిపి చాంబర్ పై తృణముల్ దాడి

పారమెంటుకు ప్రాతినిధ్యం వహించే ప్రతి పార్టీకి ఛాంబర్లు కేటాయించటం జరుగుతుంది. ఈ చాంబర్లు కొన్ని పెద్దవిగా మరికొన్ని చిన్నవిగా ఉంటాయి. దీంతో పార్టీల ఎంపీల సీట్ల సంఖ్యను బట్టి చిన్న.., పెద్ద చాంబర్లను కేటాయిస్తారు. ఈ ఎన్నికల్లో బీజేపి, కాంగ్రెస్ తర్వాత అన్నా డీఎంకే, తృణముల్ కాంగ్రెస్ పార్టీలు అత్యధిక ఎంపి స్థానాలు దక్కించుకున్నాయి. ఆ ప్రకారంగా వీరికి పెద్ద చాంబర్లు కేటాయించాలి. అయితే తమకంటే తక్కువ స్థానాలు ఉన్న టీడీపీకి పెద్ద ఛాంబర్ ఉండటంతో అది తమకు కావాలని తృణముల్ పట్టుబట్టింది. అయితే తాము ఎప్పట్నుంచో కొనసాగుతూ వస్తున్న ఆ గదిని ఖాళీ చేయమని టిడిపి ఎంపీలు కూడా అంతే స్పష్టంగా చెప్పారు. మామూలుగానే మండిపోయే తృణముల్ ఎంపీలు, అదును చూసి టిడిపి చాంబర్ పై దాడి చేశారు. టీడీపీ బోర్డులు తొలగించి తమ పార్టీ బోర్డులు తగిలించేసుకున్నారు. పార్టీ కార్యాలయాన్ని బలవంతంగా ఆక్రమించుకున్నారు. దీదీకి ఏ మాత్రం తీసిపోమని వీరంతా నిరూపించుకున్నారు. అయితే సభ్యత కల ఎంపీలుగా వ్యవహరించి ఉంటే బాగుండేదని ప్రజలు అసహనం వ్యక్తం చేస్తున్నారు. ఇలాంటి వాళ్ళా రాజ్యాంగాన్ని, దేశాన్ని గౌరవించేదని ప్రశ్నిస్తున్నారు.

కార్తిక్