మజ్లిస్ చేతిలో టీఆర్ఎస్ రిమోట్

Posted: 08/12/2014 01:05 PM IST

గవర్నర్ అధికారాల విషయంలో కేంద్రంపై విమర్శలు చేస్తున్న కేసీఆర్ పై తెలంగాణ బీజేపి అద్యక్షుడు కిషన్ రెడ్డి విమర్శలు ఎక్కుపెట్టారు. కేసీఆర్ వాస్తవాలు తెలుసుకుని మాట్లాడాలన్నారు. తెలంగాణ బిల్లులో రూపొందిచిన ఏ అంశాన్ని ఎన్డీఏ ప్రభుత్వం మార్చలేదన్నారు. బిల్లు యధాతధంగా అమలు చేస్తోంది తప్ప ప్రత్యేక ఉద్దేశ్యం ఏమి లేదన్నారు. మోడీపై విమర్శలు చేసే తెలంగాణ ముఖ్యమంత్రి బిల్లు పాసయినప్పుడు గవర్నర్ అధికారాలపై ఎందుకు నోరు మెదపలేదన్నారు.

తెలంగాణ రావటంలో బీజేపీది ముఖ్యమైన పాత్ర అనే విషయం కేసీఆర్ గుర్తుంచుకోవాలన్నారు. టీఆర్ఎస్ కలిసి వచ్చినా రాకపోయినా ఉద్యమం కొనసాగించటంతో పాటు పార్లమెంటులో బిల్లు పెట్టేలా పట్టుబట్టింది తమ నేతలే అని స్పష్టం చేశారు. ఇది మరిచిపోయి తమపై విమర్శలు చేయటం ఎంతవరకు సమంజసమన్నారు. స్వప్రయోజనాల కోసం బీజేపిపై కేసీఆర్ బురదజల్లే ప్రయత్నం చేస్తున్నారని విమర్శించారు. మజ్లిస్ కనుసన్నల్లో పనిచేస్తూ.., ఆ పార్టీ ఆడించినట్లు కేసీఆర్ ఆడుతున్నారని కిషన్ రెడ్డి దుయ్యబట్టారు.

కారు రిమోట్ మజ్లస్ చేతిలో

తెలంగాణ ఏర్పడటంలో మజ్లిస్ ఎంత కీలక పాత్ర వహించలేదో అందరికీ తెలుసు. తెలంగాణకు మద్దతివ్వటంతో ఎప్పుడూ వెనకే ఉన్న ఈ పార్టీ రాష్ర్టం ఏర్పడ్డ తర్వాత మాత్రం ప్రభుత్వ నిర్ణయాల్లో ప్రభావం చూపుతోంది. ఇందుకు ఉత్తమ ఉదాహరణ తెలంగాణ ప్రభుత్వ చిహ్నం. అందులో ముందుగా కాకతీయ తోరణం, అమరుల స్థూపం ఉంచాలని భావించారు. అయితే అసదుద్దీన్ చర్చలు జరపటంతో అప్పటికప్పుడు అమరూల స్థూపాన్ని పక్కనబెట్టి చార్మినార్ ను చేర్చారు. ఈ ఒక్కటే కాదు హైదరాబాద్ భూ ఆక్రమణలపై ఉక్కుపాదం మోపుతామని కూల్చివేతలు మొదలు పెట్టిన ప్రభుత్వం పాతబస్తీలో కనీసం ఇటుకను కూడా కదిలించటం లేదు. ఇందుకు అధికారిక కారణమేంటో తెలియదు. కాని అంతరార్ధం అందరికి తెలుసు.

కార్తిక్