ఆస్తులు అమ్ముకుంటున్న సన్ నెట్ వర్క్స్!

Posted: 08/08/2014 04:47 PM IST

యావత్తు దక్షిణా భారతదేశంలో వున్న మీడియా సంస్థల్లో సన్ నెట్ వర్క్స్ ఎంతో బాగా అభివృద్ధి చెందింది. తమిళ, తెలుగు, కన్నడ, మలయాళ వంటి తదితర భాషల్లో లెక్కలేనన్ని ఛానెళ్లను మెయింటెయిన్ చేస్తున్న సన్ నెట్ వర్క్ కు టీఆర్ పీ రేటింగ్ విషయంలో ఇంతవరకు తిరుగులేదు. ఒక్కమాటలో చెప్పాలంటే.. దక్షిణాదిన వున్న టెలివిజన్ పరిశ్రమను మొత్తం ఈ సన్ నెట్ వర్కే శాసిస్తోందని చెపప్పుకోవడంలో ఎటువంటి అనుమానం లేదు. మారన్ ల ఆధ్వర్యంలో నడుస్తున్న ఈ సంస్థ ద్వారా వారు వందలకోట్లమేరకు లాభాలను తమ వెనకేసుకున్నారు. దీంతోవారు ఈ మీడియా సంస్థతోపాటు విమానయాన రంగంలో కూడా అడుగులు వేశారు.

ఈ విధంగా ఇన్నాళ్లవరకు లాభాలబాటలో నడిచిన ఈ సన్ నెట్ వర్క్ సంస్థకు ఇప్పుడు కష్టాలు వెంటబడుతున్నట్లు సమాచారం! ప్రస్తుతం ఈ సంస్థకు యజమానిగా వ్యవహరిస్తున్న కళానిధిమారన్.. దేశంలో ఎక్కువ జీతం తీసుకునే సీఈవోల్లో ఈయన ఒకడు. టీవీ ఛానెళ్ల ద్వారా బాగానే డబ్బులు జమ చేసుకున్నా... విమానయానరంగంలో అడుగులు వేసి తప్పు చేసినట్టు కనిపిస్తోంది. మీడియా సంస్థలాగే విమానయాన రంగంలో దూసుకోవాలనే ఆశాభావంతో కళానిధి మారన్ స్పైస్ జెట్ ను కొనుగోలు చేశారు. మొదట్లో అంతా బాగానే నడిచింది కానీ.. రానురాను అందులో భారీనష్టాలు ఏర్పడటం మొదలయ్యాయి.

కష్టాలు ఎన్ని వచ్చినా.. వాటిని భరించుకుంటూ దాదాపు ఒక సంవత్సరకాలంపాటు నెగ్గుకుంటూ వచ్చారు. అయితే లాభాలు వస్తాయని భావించి ఏడాదికాలం వరకు నెగ్గుకుంటూ వస్తే.. ఏకంగా వెయ్యికోట్ల మేర నష్టాలను మూటగట్టుకుందని వార్తలు వస్తున్నాయి. దీంతో ఈ నష్టాలను భరించలేక కళానిధిమారన్ ఈ స్పైస్ జెట్ విమానసంస్థను వదిలించుకోవాలని భావిస్తున్నారట! ఇందులో భాగంగానే వారు మెజారిటీ వాటాను అమ్మేయాలని అనుకుంటున్నట్టు తమిళనాడులో వార్తలు జోరందుకుంటున్నాయి. మరి ఈ వెయ్యి కోట్ల నష్ట భారాన్ని తమ నెత్తిమీదకు వేసుకోవడానికి ఎవరు ముందుకు వస్తారా అని అందరూ ఆసక్తిగా ఎదురుచూస్తున్నారట!

AS