హాఫ్ గర్ల్‌ఫ్రెండ్‌కు పెరిగిన డిమాండ్?

Posted: 08/06/2014 08:33 AM IST

ప్రముఖ భారతీయ ఆంగ్ల రచయిత చేతన్ భగత్ కొత్త నవల హాఫ్ గర్ల్‌ఫ్రెండ్‌కు ఆన్‌లైన్‌లో డిమాండ్ బాగా పెరిగింది.. వచ్చే నవంబర్‌లో విడుదల కానున్న ఈ పుస్తకాన్ని కొనేందుకు ఈ కామర్స్ వెబ్‌సైట్ ఫ్లిప్‌కార్ట్‌లో ముందస్తు ఆర్డర్లు ప్రారంభించడంతో చేతన్ వెబ్‌సైట్‌కు ట్రాఫిక్ పెరిగిపోయి.. క్రాష్ అయింది. హాఫ్ గర్ల్‌ఫ్రెండ్ మొదటి అధ్యాయం నా వెబ్‌సైట్‌లో పోస్టు చేశాను. దురదృష్టవశాత్తు వీక్షకుల ట్రాఫిక్ వల్ల నా సైట్ క్రాష్ అయింది.

చేతన్ భగత్ తర్వాత లింక్ పోస్టు చేస్తాను అని ఆయన ట్విట్టర్‌లో ప్రకటించారు. ఆ తర్వాత లింక్‌ను తన ఫెస్‌బుక్ పేజీలో పోస్టు చేశారు. దీనికి విపరీతమైన రెస్పాన్స్ వచ్చింది. హాఫ్ గర్ల్‌ఫ్రెండ్ ఒక మామూలు ప్రేమకథ. ఇది సరిగ్గా ఇంగ్లిష్ మాట్లాడటంరాని యువకుడి కథ.

దేశంలో ఇప్పుడు ఇంగ్లిష్ భాషకు సంబంధించిన అంశాలను ఈ పుస్తకం వెలుగులోకి తెస్తుంది. ఈ పట్టణ-గ్రామీణ ప్రేమకథ పాఠకులను గుండెను తడమడమే కాకుండా వారిలో స్ఫూర్తి నింపుతుంది అని తన కొత్త నవల గురించి చేతన్ వివరించారు. రూ. 176 విలువచేసే ఈ నవలను ఫ్లిప్‌కార్ట్‌లో ముందస్తు ఆర్డర్ చేసుకుంటే.. 15శాతం డిస్కౌంట్ మీద రూ. 149కే అందజేస్తున్నారు.

దేశంలో బెస్ట్ సెల్లర్ రచయితగా పేరొందిన ఆయన గతంలో రాసిన ఫైవ్ పాయింట్ సమ్‌వన్, వన్‌నైట్ ఎట్ ద కాల్‌సెంటర్, త్రీ మిస్టేక్స్ ఆఫ్ మై లైఫ్, 2 స్టేట్స్ నవలలు ప్రాచుర్యం పొందాయి.