కేసీఆర్ దిష్టిబొమ్మను దహనం చేసిన తెలంగాణ రైతులు!!

Posted: 08/04/2014 02:42 PM IST

Telangana farmers burns kcr scarecrow medak nalgonda rangareddy districts

అవును.. మీరు వింటున్నది సాక్షాత్తూ నిజమే!! కల్వకుంట్ల రాజశేఖర్ రావు (కేసీఆర్)ను సీఎంగా గెలిపించిన తెలంగాణ రైతన్నలే ఆయన దిష్టిబొమ్మను నడిరోడ్డులో దహనం చేశారు. ముఖ్యమంత్రి అయిన తరువాత కేసీఆర్ వ్యవహరిస్తున్న తీరు ఏం బాగోలేదని వారు వాపోతున్నారు. రైతన్నల జీవితాలు బాగుపరుస్తాడనే నమ్మకంతో ఓట్లేసి గెలిపిస్తే.. ఇంతవరకు రైతుల గురించి ఒక్క అభివృద్ధి పథకాన్ని కూడా అమలు చేయలేదని వారు ఆవేదనను వ్యక్తం చేస్తున్నారు.

తెలంగాణ రాష్ట్రంలో నిరంతరం విద్యుత్ కోతలు ఏర్పడుతుండటంతో తీవ్ర ఆగ్రహానికి వ్యక్తం చెందిన రైతులు.. ఆయన మీద విమర్శలు చేయడం ప్రారంభించారు. మెదక్ జిల్లాలోని నార్సింగిలో వందలమంది రైతులు 44వ నెంబర్ జాతీయ రహదారిపై.. కేసీఆర్ కు వ్యతిరేకంగా రాస్తారోకో చేపట్టారు. నిరసనగా కేసీఆర్ దిష్టిబొమ్మను దహనం చేస్తూ.. ఆగ్రహం వెళ్లగక్కారు. దీంతో హైదరాబాద్ - నిజామాబాద్ రహదారిపై వందల సంఖ్యలో వాహనాలు నిలిచిపోయాయి. ‘‘రోజుకు కనీసం ఒక గంటపాటు కూడా విద్యుత్ సరఫరా కావడం లేదని’’ వారు ఆవేదన వ్యక్తం చేశారు. అయితే ఆ సమయంలో పోలీసులు రైతులపై లాఠీఛార్జ్ చేయడంతో పదిమందికి గాయాలయ్యాయి. మరోవైపు నల్గొండ, రంగారెడ్డి జిల్లాల్లో కూడా రైతులు సబ్ స్టేషన్లను ముట్టడించారు కూడా!