రాజకీయ నాయకుల మీద చులకనభావం!

Posted: 07/18/2014 05:52 PM IST

రాజకీయ నాయకుల మీద, ప్రభుత్వ కార్యాలయాల మీద సామాన్య ప్రజలకు ఒక రకమైన చులకన భావం ఉన్న విషయం సత్యం.  కేవలం డబ్బు సంపాదించటమే ధ్యేయంగా రాజకీయాలలోకి వచ్చి అవినీతికి ఒడిగడుతూ ఉంటారని, చెప్పే మాటలకు చేసే చేతలకు పొంతనుండదని, ప్రజా సంక్షేమం పట్టదని, తమ సీట్లను కాపాడుకోవటమే లక్ష్యంగా పనిచేస్తుంటారని, ఏం మాట్లాడినా, ఏం చేసినా అన్నిటిలోనూ అన్నివేళలా రాజకీయ నాయకులు చూసేది రాజకీయ ప్రయోజనమే తప్ప మరేమీ ఉండదని సామాన్యంగా ప్రజల్లో ఉన్న అభిప్రాయం.

దీన్ని ఆంధ్రప్రదేశ్ ముఖ్యమంత్రి చంద్రబాబు నాయుడు బాగా అర్థం చేసుకోవటమే కాకుండా ఆ ముద్రను తుడిచివెయ్యాలని కూడా సంకల్పం చేసుకున్నట్లుగా కనిపిస్తోంది.  ఎమ్మెల్యేల శిక్షణా శిబిరంలో మాట్లాడిన చంద్రబాబు, టివిల్లో అసెంబ్లీ సమావేశాలను చూడటానికి కూడా ప్రజలు ఇష్టపడటం లేదని, ఆ పరిస్థితి మారాలని, రాజకీయాలంటే ప్రజలలో గౌరవం పెరగాలని, అది మన ప్రవర్తనతోనే వస్తుందని అన్నారు.

ప్రధాన మంత్రి నరేంద్ర మోదీ కూడా పార్లమెంట్ సభ్యులకు శిక్షణా శిబిరాన్ని ఏర్పాటు చేసి ఇదేవిధంగా విషయావగాహన చేసుకోవాలని, పార్లమెంట్ సమయాన్ని వృధా
చెయ్యకుండా సరైన విధానంలో చర్చలు సాగించాలని కోరారు.  అలాగే చంద్రబాబు కూడా చట్ట సభల్లో అర్థవంతమైన చర్చలుండాలని, అసెంబ్లీ అంటే ప్రజా సమస్యల పరిష్కార వేదికగా ఉండాలని అన్నారు.  

శ్రీరామచంద్రుని ఆదర్శంగా తీసుకుని ధర్మాన్ని కాపాడుతూ నిజాయితీగా పనిచేస్తూ అధికారపక్షం, ప్రతిపక్షమనే తేడా లేకుండా అభివృద్ధి పథంలో ముందుకెళ్దామన్న చంద్రబాబు, పేదరికం లేని సమాజం కోసం కృషిచేద్దామని పిలుపునిచ్చారు.

-శ్రీజ