ఫేస్ బుక్ తో రేపిస్టులకు న్యాయం జరుగుతుందా???

Posted: 07/15/2014 03:53 PM IST

ప్రస్తుతకాలంలో మన భారతదేశంలో మహిళలపై రానురాను అరాచకాలు మరీ దారుణంగా పెరిగిపోతున్నాయి. అమ్మాయి ఇంటినుంచి బయటికి వెళ్తే ఇంటికి తిరిగి వస్తుందో, రాదోనన్న భయంతో తల్లిదండ్రులు ఆందోళనల్లో మునిగిపోతున్నారు. ఎప్పుడు, ఎక్కడ, ఎవరూ, ఎలా వచ్చి తమ అమ్మాయిల్ని తీసుకెళ్లి అఘాయిత్యం చేస్తారోనన్న భయం కూతురున్న ప్రతి తల్లిదండ్రుల్లో పుట్టుకొస్తోంది. ఆఖరికి రక్షణ కల్పించాల్సిన పోలీసులే ఇటువంటి అఘాయిత్యాలు పాల్పడుతున్నారు. ఇందుకు నిదర్శనమే తాజాగా యూపీలోని పోలీస్ శాఖలో జరిగిన మరో విషాదం!

యూపీలోని పోలీస్ శాఖలో ఎస్సైగా విధులు నిర్వహిస్తున్న ఓ మహిళా అధికారిపై డీఐజీ స్థాయి అయిన ఒక ఆఫీసర్ లైంగిక వేధింపులకు పాల్పడ్డాడు. దీనిపై ఆమె తన పై అధికారులకు ఫిర్యాదు చేసినప్పటికీ.. వారు మాత్రం ఆ అధికారిపై చట్టరీత్యా చర్యలు తీసుకోకుండా, ఈమెనే భయపెట్టి అక్కడి నుంచి తరిమేశారు. న్యాయపోరాటం కోసం పాట్లుపడుతూ... పై అధికారులకు సలామ్ లు చేస్తూ ఎన్ని ప్రయత్నాలు చేసినా... ఆమెకు ఫలితం మాత్రం దక్కలేదు. పైగా అతని వేధింపులు రానురాను మరీ మితిమీరిపోతున్నాయి. దిక్కుతోచని పరిస్థితిలో వున్న ఆ మహిళా అధికారి చివరికీ ఫేస్ బుక్ ని ఆశ్రయించి, నాకు న్యాయం జరిగేలా సహాయం చేయండూ అంటూ తన గోడును చెప్పుకుంది.

తన బ్యాచ్ లో శిక్షణలో టాపర్ గా నిలిచిన ఆమె, ఫేస్ బుక్ లో తన సమస్య గురించి ప్రస్తావించగానే వేలాది మంది ఆమెకు మద్దతు పలికారు. ‘‘నా సహచర ఉద్యోగులే నామీద జరుగుతున్న అఘాయిత్యాలను పట్టించుకోకుండా, ఫిర్యాదు అంగీకరించని పక్షంలో.. నాకు ఫేస్ బుక్ ను ఆశ్రయించడం తప్ప వేరే మార్గం కనిపించలేదు’’ అని ఓ పోలీస్ అకాడమీలో సైబర్ క్రైం విషయాల గురించి బోధిస్తున్న ఆమె పేర్కొన్నారు. మన దేశంలో అమ్మాయిల మీద జరుగుతున్న అఘాయిత్యాలను అడ్డుకట్ట వేయాలంటే నలుగురు చేతులు కలిపి ముందుకు సాగాల్సిందేనని ఆమె చెప్పారు.

ఈమె ఫేస్ బుక్ లో పోస్ట్ చేయగానే వేలాంది మంది నెటిజన్లు... ‘‘సొంత శాఖలోనే ఒక ఉద్యోగినిపైన అఘాయిత్యాలకు పాల్పడుతున్న పోలీసు శాఖ నుంచి మనం ఇక రక్షణను ఎలా ఆశిస్తాం?’’ అంటూ మద్దతు పలికారు. ఈ విధంగా నెటిజన్లు మద్దతు పలికినందుకు ఆమె ఎంతో హర్షం వ్యక్తం చేసింది. ఫేస్ బుక్ ద్వారా నా బాధను కొంతలో కొంతైనా తగ్గించుకోగలిగానని ఆమె చెప్పుకొచ్చారు.

AS