భూమ్మీదకు రండి ఎఫ్ఎమ్ సార్!

Posted: 07/02/2014 06:56 PM IST

కేంద్ర ఆర్థిక మంత్రి అరుణ్ జైట్లీ కార్యాలయం నుంచి ఫేస్ బుక్ లో వర్ల్ డ్ యుఎఫ్ఓ డే శుభాకాంక్షలు తెలియజేయటం మీద సర్వత్రా ఆక్షేపణలు మిన్నుముట్టాయి.  అన్ ఐడెంటిఫైడ్ ఫ్లైయింగ్ ఆబ్జెక్ట్ (యుఎఫ్ఓ) ని సెలబ్రేట్ చేసుకోవటం వలన మనమే కాకుండా రోదసిలో జ్ఞానమున్న జీవాలున్నాయన్న సంగతిని గుర్తుచేసుకోవటమౌతుందని కూడా ఆ ఫేస్ బుక్ పోస్ట్ లో ఉంది.  కింద అరుణ్ జైట్లీ పేరు, గోధుమ పొలం మీద ఫ్లైయింగ్ సాసర్ బొమ్మ కూడా అందులో ఉంది.

దానికి వివిధ రకాల వ్యాఖ్యానాలు వచ్చాయి.  

"అయ్యా మంత్రిగారు మేము పెరిగిన ధరలను సెలబ్రేట్ చేసుకుంటున్నాం.  మీరు బడ్జెట్ లో ఇంకా ఏమేం ధరలు పెంచేస్తారో అని భయపడుతున్నాం.  మీరు కాసేపు బయటి ప్రపంచంలోంచి తిరిగి మన భూమ్మీదకు రాగూడదూ, సామాన్య మానవుడి ఇబ్బందులను పట్టించుకోగూడదూ!" అంటూ కామెంట్లు వచ్చాయి.  

దానితో ఫేస్ బుక్ లోని ఆ పోస్టింగ్ ని తీసేయటం జరిగింది.  

జూలై 10 న అరుణ్ జైట్లీ ప్రవేశపెట్టబోతున్న బడ్జెట్ గురించి ఆందోళన చెందుతున్న వారంతా ఈ ఫేస్ బుక్ లో రాసింది చూసి ఆగ్రహాన్ని వెలిబుచ్చారు.  ఆర్థిక శాఖ అధికారులు కూడా, ఫేస్ బుక్ లో రాసింది తాము చూసామని, అయితే ఇలాంటివి రాసేటప్పుడు మంత్రిగారి వ్యక్తిగత సిబ్బంది కాస్త జాగ్రత్త వహించాలని చురకలంటించారట.  

అది ఫైనాన్స్ మినిస్టర్ ఫేస్ బుక్ అకౌంటేనని, దాన్నెవరూ హ్యాకింగ్ చెయ్యలేదని కూడా తన పేరుని గుప్తంగా ఉంచమని కోరిన సిబ్బందిలో ఒకరు తెలియజేసారు.

-శ్రీజ