ఆధార్ ఉంటే డబ్బులు ఇస్తాం? సీఎం

Posted: 06/26/2014 07:43 AM IST

అందరికి ఆధార్ కార్డు ఉండాలని గత ప్రభుత్వం చెప్పిన విషయం తెలిసిందే. అయితే ఇప్పుడు మాత్రం ఆధార్ కార్డు ఉంటే డబ్బులు ఇస్తాం అని చెప్పటానికి ఒక ముఖ్యమంత్రి రెడీ అవుతున్నారు. ఆయన ఎవరు కాదో.. ఆంద్రప్రదేశ్ ముఖ్మమంత్రి నారా చంద్రబాబు నాయుడు. ముఖ్యమంత్రి చంద్రబాబు నాయుడు చేసిన తొలి సంతకం రైతు రుణమాఫీ ఫైల్ పైన చేసిన సంగతి తెలిసిందే. అనంతరం దానిపై కోటయ్య కమిటీ వేసి, వారీ నివేదిక వచ్చినాకే నిర్ణయం తీసుకుంటామని అన్నారు. అయితే తాజాగా మరో మాట అంటుంది ఆంధ్రప్రదేశ్ ప్రభుత్వం. రుణమాఫీ చేయాలంటే లబ్ధిదారుడు ఆధార్ కార్డును చూపాలని ప్రభుత్వం నిర్ణయం తీసుకుంది.

అక్రమ లబ్ధిదారులను అరికట్టడానికే ఆధార్ లింక్ చేస్తున్నట్లు వ్యవసాయశాఖ మంత్రి పత్తిపాటి పుల్లారావు చెప్పారు. అయితే కార్డులు లేని రైతులకు కూడా కార్డులు తీయించి లింక్ చేస్తామని చెబుతున్నారు. భూమి లేకున్నా రుణాలు తీసుకున్న వారు, ఒకే భూమి మీద నాలుగైదు సార్లు లోన్ తీసుకున్నవారు ఉన్నారని, అందుకే ఈ నిర్ణయం తీసుకున్నామని అన్నారు.

ఈ నిర్ణయం ఇప్పుడు రైతులలో కొత్త కలవరం రేపుతుంది. అయితే తెలుగుదేశం పార్టీ ప్రతిపక్షంలో ఉన్నప్పుడు, ఆధార్ కార్డుల విషయంలో చాలా వ్యతిరేకత వ్యక్తం చేసింది ఆధార్ కార్డుల లింక్ చేసి సామాన్యులను ఇబ్బంది పెట్టొద్దు అని డిమాండ్ చేసింది. అదార్ కార్డు ఆధారం లేని కార్డు అని విమర్శలు చేసిన పార్టీ ఇప్పుడు రైతు రుణమాఫీకి ఎలా లింక్ పెడుతుంది అనే విమర్శలు వస్తున్నాయి.

రాష్ట్రంలోని దాదాపు 42 శాతం మంది ప్రజలకు ముఖ్యంగా రైతులకు ఈ కార్డులు లేవు. మరి ఇలాంటి క్రమంలో ఈ నిర్ణయం తీసుకోవడం ఏంటి అని సామాన్యులు ప్రశ్నిస్తున్నారు. ఈ విమర్శలకు సీఎంబాబు ఎం సమాధానం ఇస్తారో వేచి చూడాలి.

RS