శోభ నాగిరెడ్డి ఎన్నికపై శవరాజకీయాలు!

Posted: 05/02/2014 12:12 AM IST

కర్నూలు జిల్లా ఆళ్లగడ్డ ఎమ్మెల్యే స్థానానికి జరుగుతున్న ఎన్నిక పరిస్థితి ప్రస్తుతం డైలమాలో పడింది. ఈ స్థానం నుంచి వైకాపా తరఫున పోటీచేస్తున్న భూమా శోభ రోడ్డు ప్రమాదంలో మరణించడంతో ఇక్కడ ప్రతిష్టంభన ఏర్పడింది.

అయితే ఈ ఎన్నిక గురించి ఎన్నికల సంఘం నిర్ణయం గురించి కొందరు వ్యక్తులు శవరాజకీయం చేయడం ప్రారంభించారు.

ఎన్నికల అధికారి భన్వర్‌లాల్‌ ఇక్కడ ఆమెకు వేసే ఓటు చెల్లదని, ఆమెకు మెజారిటీ వస్తే.. రెండో స్థానంలోని వారిని గెలిచినట్లు ప్రకటిస్తామని పేర్కొన్నారు. అయితే ఆ తరువాత.. కేంద్ర ఎన్నికల సంఘం పూర్తి వివరణ ఇస్తూ.. శోభకు వేసే ఓటు చెల్లుతుందని ... ఆమెకు మెజారిటీ వస్తే ఉప ఎన్నిక జరుగుతుందని స్పష్టం చేశారు.

ఎటూ ఉప ఎన్నిక జరిగినా సరే ఆ సీటు వైకాపా పరం అవుతుందని.. అలా కాకుండా.. శోభ పేరు తొలగింపజేస్తే తాము లబ్ధి పొందుతామని ఆశిస్తున్న పార్టీల వారే వక్రబుద్ధితో కేంద్ర ఎన్నికల సంఘం తీసుకున్న నిర్ణయాన్ని సవాలు చేస్తూ హైకోర్టులో కేసు వేశారు. చనిపోయిన తర్వాత.. ఆ అభ్యర్థి కి ఓటు వేయాలన్నట్లుగా ఈవీఎంలో మాత్రం ఉంచడంలో అర్థం లేదంటూ కేసు వేశారు. ఈవీఎం లలోంచి శోభ పేరును తొలగించాలంటూ కేసులో పేర్కొన్నారు. ఈ విషయంలో హైకోర్టు ఎన్నికల సంఘానికి నోటీసు జారీచేసింది. అయితే ఒకసారి ఎన్నికల ప్రక్రియ మొదలైన తర్వాత.. ఇక ఎన్నికల సంఘం విధుల్లో కోర్టు జోక్యం చేసుకోజాలదంటూ ఈసీ కోర్టు ఎదుట వాదించింది.

ఈవీఎం నుంచి శోభ పేరును తొలగించాలన్న పిటిషనర్‌ వాదనను తోసిపుచ్చిన కోర్టు.. తదుపరి ఉత్తర్వులు వచ్చేవరకు ఆళ్లగడ్డ ఎన్నిక ఫలితాన్ని పెండింగ్‌లో పెట్టాలని ఆదేశించినట్లు తెలుస్తోంది. ఎటూ ఉప ఎన్నిక జరిగినా సరే ఆ సీటు వైకాపా పరం అవుతుందని.. అలా కాకుండా.. శోభ పేరు తొలగింపజేస్తే తాము లబ్ధి పొందుతామని ఆశిస్తున్న పార్టీల వారే వక్రబుద్ధితో ఈ వ్యవహారాన్ని నడిపిస్తుండవచ్చునని ప్రజలు అనుకుంటున్నారు. ఎన్నికలో గెలిచే సత్తా లేక.. శవరాజకీయాలు చేస్తున్నారని ఆళ్లగడ్డ ప్రజలు అనుకుంటున్నారు. -