మాజీ మంత్రి గల్లా అరుణపై దౌర్జన్యం

Posted: 04/27/2014 11:28 AM IST

చంద్రగిరి అసెంబ్లీ టీడీపీ అభ్యర్థి గల్లా అరుణకుమారిపై శనివారం వైసీపీ శ్రేణులు ఎన్నికల ప్రచారానికి రావద్దంటూ సామిరెడ్డిపల్లెలో అడ్డుకున్నారు. గ్రామంలోకి మాజీ మంత్రి రాకూడదని, ప్రచారం చేయకూడదంటూ వాహనశ్రేణిని అడ్డుకున్నారు.ఆమె వాహనంపై రాళ్లు రువ్వారు. ఈ విషయం తెలిసి టీడీపీ శ్రేణులూ అక్కడికి చేరుకుని ఆందోళనకు దిగారు. వైసీపీ తీరుకు నిరసనగా పలుచోట్ల తెలుగు తమ్ముళ్లు రాస్తారోకో చేపట్టారు.

తన ఎన్నికల ప్రచారంలో భాగంగా శనివారం సాయంత్రం గల్లా అరుణకుమారి సామిరెడ్డిపల్లెకు చేరుకున్నారు. గ్రామంలో ప్రచారం చేయరాదంటూ వైసీపీ శ్రేణులు ఆమెను అడ్డుకున్నారు. ప్రజాస్వామ్యంలో ప్రచారం చేసుకోనీయకుండా అడ్డుకోవడం తగదని టీడీపీ నేతలు పేర్కొన్నారు. గ్రామంలో ప్రచారం చేస్తామంటూ వారు పట్టుబట్టారు. దీంతో టీడీపీ, వైసీపీ శ్రేణుల మధ్య ఘర్షణ చోటుచేసుకొంది. గ్రామంలోకి మాజీ మంత్రి రాకూడదని, ప్రచారం చేయకూడదంటూ వాహనశ్రేణిని అడ్డుకున్నారు.

పోలీసులు రంగ ప్రవేశం చేసి రెండు వర్గాల వారికి నచ్చచెప్పినా ఫలితం లేకుండా పోయింది. ఈ వివాదం తెలిసి రెండు పార్టీల నాయకులు, కార్యకర్తలు అక్కడికి చేరుకోవడంతో ఉద్రిక్తత నెలకొంది. మండలంలో వైసీపీ నేత చెవిరెడ్డి భాస్కర్‌రెడ్డి ప్రచారాన్ని తామూ అడ్డకుంటామని టీడీపీ నాయకులు హెచ్చరించారు. వైసీపీ, టీడీపీ నాయకుల మధ్య వాగ్వాదం, తోపులాటలు జరిగాయి. ఎట్టకేలకు తర్వాత గల్లా అరుణకుమారి గ్రామంలోని టీడీపీ మద్దతుదారుల ఇంటికెళ్లి ప్రచారం నిర్వహించారు. అనంతరం బయనపల్లెకు వెళ్లేందుకు.. వాహనశ్రేణి సామిరెడ్డిపల్లె పాఠశాల సమీపానికి చేరుకోగానే.. మళ్లీ రెండు వర్గాల వారు ఘర్షణ పడ్డారు. ఈ క్రమంలో అరుణకుమారి వాహనంపై వైసీపీ కార్యకర్తలు రుళ్లు రువ్వారు. దీంతో ఒక్కసారిగా ఉద్రిక్తత వాతావరణం నెలకొంది. రెండు వర్గాలూ రాళ్ల దాడులకు దిగడంతో పోలీసులు లాఠీచార్జీ చేసి చెదరగొట్టారు. ఈ సంఘటనలో రెండు వర్గాలకు చెందిన పలువురు గాయపడ్డారు.