ఎట్టకేలకు కాంగ్రెస్ కు మద్దతు ప్రకటించిన హార్థిక్..

Posted: 11/22/2017 06:41 PM IST

గుజరాత్‌ అసెంబ్లీ ఎన్నికల నేప‌థ్యంలో గత కొంత కాలంగా కాంగ్రెస్ పటీదార్ కులస్థులపై పెట్టుకున్న అశలు ఎట్టకేలకు ఫలించాయి. పటీదార్ అనామత్ అందోళన్ సమితి అధ్యక్షుడు హార్థిక్ పటేల్ వర్గీయుల నుంచి కాంగ్రెస్ పార్టీకి శుభ‌వార్త అందింది. అసెంబ్లీ సీట్ల ఒప్పందం విషయంలో కాంగ్రెస్‌, పటేల్ వర్గీయుల మధ్య ఒప్పందం విషయంలో కాసింత బేధాభిప్రాయాలు వచ్చిన విష‌యం తెలిసిందే. ప‌టేల్ వర్గీయులు అడిగిన‌న్ని సీట్లు ఇవ్వ‌లేమ‌ని కాంగ్రెస్ తేల్చి చెప్ప‌డంతో ఆ పార్టీకి ప‌టేల్ వ‌ర్గీయులు మ‌ద్ద‌తు ప్ర‌క‌టిస్తారా? అన్న విష‌యంపై నెల‌కొన్న‌ సందిగ్ధ‌తకు ఎట్టకేలకు తెర‌ప‌డింది.

ఎట్టకేలకు హార్థిక పటేల్ కాంగ్రెస్ కు మద్దతు ప్రకటించారు. దీంతో పాటు పటీధార్ వర్గీయులు డిమాండ్ చేస్తున్నట్లుగా ఇప్పుడున్న 49 శాతం రిజర్వేషన్ ను ఏమాత్రం కదపకుండా పటీదార్ సామాజిక వర్గానికి ప్రత్యేక రిజర్వేషన్ కూడా కల్పిస్తామని హామి ఇచ్చిన నేపథ్యంలో హార్దిక్‌ పటేల్ మీడియాతో మాట్లాడుతూ కాంగ్రెస్‌కు, త‌మ‌కు మ‌ధ్య ఒప్పందం కుదిరింద‌ని చెప్పారు. తమ షరతులకు కాంగ్రెస్‌ ఒప్పుకుందని తెలిపారు.

త‌మ వ‌ర్గానికి రిజర్వేషన్‌ కల్పించేందుకు కాంగ్రెస్‌ అంగీకరించిందని, అధికారంలోకి వచ్చిన తర్వాత పటేల్‌ రిజర్వేషన్లపై అసెంబ్లీలో బిల్లు పెడతామని చెప్పింద‌ని వివ‌రించారు. కాంగ్రెస్‌, పటేల్‌ నేతల మధ్య ఎలాంటి భేదాభిప్రాయాలు లేవని, అసెంబ్లీ సీట్ల‌ టికెట్ల గురించి తాము అస‌లు కాంగ్రెస్‌ను అడగలేదని హార్దిక్ ప‌టేల్ చెప్పుకొచ్చారు. త‌మ క‌మ్యూనిటీని విడ‌దీసేందుకు బీజేపీ కుట్ర‌లు ప‌న్నుతోంద‌ని ఆయన ఆరోపించారు.