విండీస్ పై రెండో టెస్టులో అసీస్ విజయం.. సిరీస్ కూడా

Posted: 12/29/2015 05:35 PM IST

అనుకున్నట్లుగానే జరిగింది. అసీస్ తో ఫ్రాంక్ వోరల్ ట్రోఫిలో భాగంగా మూడు టెస్టుల సిరీస్ లో జరిగిన రెండో టెస్టులో వెస్టిండీస్ విలవిలలాడింది. దీంతో రెండో టెస్టులో ఆస్ట్రేలియా  ఘన విజయం సాధించింది. మరో టెస్టు మ్యాచ్ ఆడకుండానే సిరీస్ తమ వశం చేసుకుంది. 460 పరుగుల విజయ లక్ష్యంతో మంగళవారం రెండో ఇన్నింగ్స్ ఆరంభించిన విండీస్ 282 పరుగులకే పరిమితమై ఓటమి పాలైంది.  విండీస్ ఆటగాళ్లలో రామ్ దిన్(59), జాసన్ హోల్డర్(68) మినహా ఎవరూ రాణించకపోవడంతో ఘోర ఓటమి తప్పలేదు. ఆస్ట్రేలియా బౌలర్లలో మిచెల్ మార్ష్ నాలుగు వికెట్లు తీసి విండీస్ పతనాన్ని శాసించగా,  నాథన్ లయన్ కు మూడు, పాటిన్సన్ కు రెండు, పీటర్ సిడెల్ కు ఒక వికెట్ దక్కింది.
 
అంతకుముందు ఆస్ట్రేలియా ఓవర్ నైట్ స్కోరు 179/3 వద్దే రెండో ఇన్నింగ్స్ ను డిక్లేర్ చేసి ఓవరాల్ గా 459 పరుగుల ఆధిక్యం సాధించింది. దీంతో భారీ లక్ష్యంతో బ్యాటింగ్ చేపట్టిన విండీస్ ఆదిలో కాస్త ఫర్వాలేదనిపించినా.. ఆ తరువాత 118 పరుగులకే నాలుగు వికెట్లను కోల్పోయి కష్టాల్లో పడింది.  అనంతరం రామ్ దిన్ -హోల్డర్ లు  జట్టును ఓటమి నుంచి గట్టెక్కించే యత్నం చేశారు. కాగా, వీరిద్దరూ అవుటైన తరువాత విండీస్ కథ మళ్లీ మొదటకొచ్చింది. విండీస్ తన చివరి నాలుగు వికెట్లను 32 పరుగులకే కోల్పోయింది. దీంతో  ఆసీస్ 179 పరుగుల తేడాతో విజయం సాధించి సిరీస్ ను 2-0 తేడాతో గెలుచుకుంది.

జి. మనోహర్