బెంగాల్ ఎన్నికల రేసులో గంగూలీ

Posted: 09/23/2015 05:00 PM IST

Sourav ganguly making plans to become cab president jagmohan dalmia death news

ఇన్నాళ్లూ సైలెంట్ గా వున్న టీమిండియా మాజీ కెప్టెన్ సౌరవ్ గంగూలీకి టైమొచ్చింది.. అందుకే రాబోయే ఎన్నికల బరిలో నిలిచేందుకు ఆయన సన్నాహాలు చేస్తున్నారు. అయితే.. ఆయన పోటీ చేస్తోంది రాజకీయాల నేపథ్యంలో కాదులెండి, క్రీడా నేపథ్యంలోనే! బెంగాల్ క్రికెట్ అసోసియేషన్ (సీఏబీ) అధ్యక్ష పదవి రేసులో పోటీ చేసేందుకు గంగూలీ ప్రయత్నాలు చేస్తున్నట్లు సమాచారం. బీసీసీఐ అధ్యక్షుడు జగ్మోహన్ దాల్మియా హఠాన్మరణం పొందడంతో ఆ సంస్థ ‘బాస్’ సీటుతోపాటు బెంగాల్ క్రికెట్ అసోసియేషన్ అధ్యక్ష పదవి కూడా ఖాళీ అయ్యింది. దీంతో బెంగాల్ అధ్యక్ష పదవి ఎవరికి దక్కుతుందోనన్న ఆసక్తి నెలకొంది.

ఇదిలావుండగా.. సోమవారం జరిగిన దాల్మియా అంత్యక్రియల సందర్భంగా.. దాల్మియా వారసత్వాన్ని కొనసాగించాలని గుంగూలీకి పశ్చిమ బెంగాల్ ముఖ్యమంత్రి మమతాబెనర్జీ సూచించారు. బెంగాల్ లో తనకు అత్యంత ప్రజాదరణ కలిగి వుండటంతోపాటు మమతా మద్దతు కూడా వుండటంతో.. అధ్యక్ష పదవి చేపట్టడం గంగూలీకి సులువుగానే కనిపిస్తున్నట్లు తెలుస్తోంది. దాదాపు.. అతనికి ఆ పదవి వరిస్తుందని అభిప్రాయాలు వెలువడుతున్నాయి. కానీ.. ఇక్కడో చిన్న మెలిక కూడా వుంది. క్రికెట్ అడ్మినిస్ట్రేషన్ లో గంగూలీకి అనుభవం లేదు. ఇదే అతనికి మైనస్ పాయింట్. దీని కారణంగా ఆయనకు ఆ అధ్యక్ష పదవి దక్కకపోవచ్చుననే అనుమానాలు వ్యక్తమవుతున్నాయి. ప్రస్తుతం బెంగాల్ క్రికెట్ అసోసియేషన్ జాయింట్ సెక్రటరీగా వ్వవహరిస్తున్న గంగూలీకి అధ్యక్ష పదవి వరిస్తుందో లేదో వేచి చూడాల్సిందే!

మరోవైపు బలంగా వినిపిస్తున్న వార్తలేమిటంటే.. ఈ అధ్యక్ష పదవిని దక్కించుకోవడం కోసం గంగూలీ తీవ్రస్థాయిలో ప్రయత్నాలు చేస్తున్నట్లు తెలుస్తోంది. ఇప్పటికే దీదీ అతనికి మద్దతు ప్రకటించగా.. ఆమె అండదండలతోనే దాన్ని కైవసం చేసుకునేందుకు ట్రై చేస్తున్నాడట. అందుకే.. ఆమెతో సన్నిహితంగా మెలుగుతున్నాడని సమాచారం.