‘బాస్’ పదవిపై అనురాగ్ కన్ను.. రేసులో మరో ముగ్గురు!

Posted: 09/21/2015 12:57 PM IST

Anurag thakur may choose as bcci chairman according to the source

ప్రపంచ క్రికెట్ లో బీసీసీఐకి ఆర్థిక అవసరాలు అందించడమే కాకండా ఆ సంస్థను ప్రపంచంలోనే ధనిక బోర్డుగా మలచిన అధ్యక్షుడు జగ్మోహన్ దాల్మియా హఠాన్మరణంతో బీసీసీఐ తీవ్ర దిగ్భ్రాంతికి గురైంది. బీసీసీఐలో సుదీర్ఘ అనుభవం ఉన్న దాల్మియా హఠాత్తుగా తుది శ్వాస విడివడంతో.. ఇప్పుడు బోర్డు పగ్గాలు చేపట్టేదెవరు? అనే ప్రశ్న దేశవ్యాప్తంగా చర్చనీయాంశంగా మారింది. ఈ నేపథ్యంలోనే ఆ బోర్డు కార్యదర్శియే పగ్గాలు చేపట్టే అవకాశం వుందన్న అభిప్రాయాలు వెలువడుతున్నాయి.

నిజానికి.. బోర్డు చైర్మన్ లేని సమయంలో బోర్డు కార్యదర్శిదే కీలక భూమిక వుంటుంది. అంతేకాదు.. అధ్యక్ష పదవి ఖాళీ అయిన 15 రోజుల్లోగా బోర్డును సమావేశపరచి, కొత్త అధ్యక్షుడి ఎన్నికకు చర్యలు తీసుకోవాల్సింది కూడా కార్యదర్శే. దీంతో ప్రస్తుతం కార్యదర్శి పదవిలో ఉన్న అనురాగ్ ఠాకూర్... నిబంధనల మేరకు సమావేశం ఏర్పాటు చేస్తారా? లేక సుప్రీంకోర్టు ఆదేశాల కోసం ఎదురు చూస్తారా? అన్న అంశంపై ఆసక్తి నెలకొంది. మరోవైపు.. తానే అధ్యక్షుడిగా ఎన్నికయ్యేందుకు ఠాకూర్ పావులు కదుపుతున్నారన్న వాదనలు తీవ్రస్థాయిలో వినిపిస్తున్నాయి. ప్రస్తుతం బోర్డులో ఉన్న వాతారణం ఠాకూర్ ఎన్నికకు అనుకూలంగానే వుందని విశ్లేషణలు తెలుపుతున్నాయి.

ఈ అధ్యక్ష పదవి ఠాకూర్ తోపాటు రేసులో రాజీవ్ శుక్లా ముందు వరుసలో ఉన్నారు. ఉత్తరప్రదేశ్ క్రికెట్ అసోసియేషన్ అధ్యక్షుడిగా ఉన్న ఈ కాంగ్రెస్ నేతకు ఈశాన్య రాష్ట్రాల బోర్డుల మద్దతు లభించాల్సి ఉంది. ఇక గ్వాలియర్ నుంచి ప్రాతినిధ్యం వహిస్తున్న గౌతం రాయ్ పేరు కూడా వినిపిస్తోంది కానీ.. ఆయనకు బీసీసీఐలో మెజారిటీ మద్దతు లేదు. ఢిల్లీ బోర్డు అధ్యక్షుడిగా ఉన్న సీకే ఖన్నా పరిస్థితి కూడా అలానే ఉంది. దీంతో ఠాకూర్ కే చైర్మన్ పదవి లభించడం ఖాయమని తెలుస్తోంది. మరి.. చివరికి ఫలితాలు ఎలా వెలువడుతాయో వేచి చూడాల్సిందే!