ముర్రేకే వింబుల్డన్ టైటిల్

Posted: 07/08/2013 12:35 PM IST

వింబుల్డన్ సాధించాలనుకోవడం ప్రతి టెన్నిస్ ఆటగాడికి ఉండే కల. ఆ కలను నెరవేర్చుకోవడానికి బ్రిటన్ మాత్రం 77 ఏళ్ళు నిరీక్షించాల్సి వచ్చింది. 1936 తరువాత ఒక్క వింబుల్డన్ గెలవని బ్రిటన్ కి ముర్రే వింబుల్డన్ అందించి వారి సుదీర్ఘ నిరీక్షణకు తెరదించారు. ఈ విజయంతో 1936లో ఫ్రెడ్ పెర్రీ తర్వాత ఈ ప్రతిష్టాత్మక సింగిల్స్ టైటిల్‌ను నెగ్గిన తొలి బ్రిటన్ క్రీడాకారుడిగా ముర్రే గుర్తింపు పొందాడు. నిన్న జరిగిన పురుషుల సింగల్స్ ఫైనల్స్ హోరాహోరీ పోరాటంలో ఆండిముర్రే జొకోవిచ్ ని ఓడించి వింబుల్డన్ చాంపియన్‌గా అవరించాడు. ఆదివారం జరిగిన ఫైనల్లో రెండో సీడ్ ఆండీ ముర్రే 6-4, 7-5, 6-4తో టాప్ సీడ్, ప్రపంచ నంబర్‌వన్ నొవాక్ జొకోవిచ్ (సెర్బియా)పై గెలిచి కెరీర్‌లో రెండో గ్రాండ్‌స్లామ్ టైటిల్‌ను సొంతం చేసుకున్నాడు. విజేతగా నిలిచిన ముర్రేకు 16 లక్షల పౌండ్లు (రూ. 14 కోట్ల 36 లక్షలు) ప్రైజ్‌మనీగా లభించాయి. గత ఏడాది రోజర్ ఫెడరర్ చేతిలో ఓడిపోయి రన్నరప్‌గా నిలిచిన ముర్రే ఈసారి మాత్రం ఆరంభం నుంచి పూర్తి విశ్వాసంతో ఆడి విజేతగా అవతరించాడు. స్కాట్లాండ్‌కు చెందిన ముర్రే గత ఏడాది యూఎస్ ఓపెన్ ఫైనల్లో జొకోవిచ్‌నే ఓడించి తొలి గ్రాండ్‌స్లామ్ టైటిల్‌ను సాధించాడు. అయితే సొంత గడ్డ పై ముర్రే గెలిచిన తీరు యావత్తు టెన్నిస్ ప్రపంచాన్నే ఆశ్చర్యానికి గురిచేసింది. టాప్ సీడ్ జొకోవిచ్ ఒక్కసెట్టు కూడా గెలవకుండా ఓడటం చూస్తుంటే... టెన్నిస్ శకంలో కొత్త అధ్యాయం మొదలైట్లే కనిపిస్తుంది.