Posted: 01/28/2013 03:15 PM IST

ఆస్ట్రేలియా ఓపెన్ పురుషుల టెన్నిస్ లో జొకోవిచ్ చరిత్ర స్రుష్టించాడు. ఆదివారం జరిగిన పురుషుల ఫైనల్లో బ్రిటన్ స్టార్ ఆండి ముర్రేని చిత్తు చేసి వరుసుగా మూడోసారి ఆస్ట్రేలియా ఓపెన్ తొలి సీజన్ లో ‘హ్యాట్రిక్ ’ నమోదు చేసిన తొలి క్రీడాకారుడిగా చరిత్ర నెలకొల్పాడు. అపురూపమైన ఆటతీరుతో... అలసటలేని పోరాటంతో... సుదీర్ఘ సమరాల్లో విజయానికి పర్యాయపదంగా మారుతూ.... పురుషుల టెన్నిస్‌లో తన గుత్తాధిపత్యాన్ని నిరూపించుకుంటూ... గత నాలుగున్నర దశాబ్దాలలో ఆస్ట్రేలియన్ ఓపెన్ టోర్నీలో ఎవరికీ సాధ్యంకాని విన్యాసాన్ని నొవాక్ జొకోవిచ్ నమోదు చేశాడు. నిన్న 3 గంటల 40 నిమిషాలపాటు జరిగిన ఫైనల్లో టాప్ సీడ్ జొకోవిచ్ 6-7 (2/7), 7-6 (7/3), 6-3, 6-2తో మూడో సీడ్ ఆండీ ముర్రే (బ్రిటన్)పై గెలిచాడు. విజేతగా నిలిచిన జొకోవిచ్‌కు 24 లక్షల 30 వేల ఆస్ట్రేలియన్ డాలర్లు (రూ. 13 కోట్ల 62 లక్షలు)... రన్నరప్ ఆండీ ముర్రేకు 12 లక్షల 15 వేల ఆస్ట్రేలియన్ డాలర్లు (రూ. 6 కోట్ల 81 లక్షలు) ప్రైజ్‌మనీగా లభించాయి. ఓవరాల్‌గా జొకోవిచ్‌కిది నాలుగో ఆస్ట్రేలియన్ టైటిల్.