Posted: 12/12/2012 10:59 AM IST

ఇన్నాళ్ళకు తెలుగు తేజం అంబిటి తిరుపతి రాయుడికి అద్రుష్టం దక్కింది. ఎన్నో ఏళ్ళుగా పడ్డ కష్టానికి ప్రతిఫలం, కళ నెరవేరబోతుంది. మన రాష్ట్రానికి చెందిన గుంటూరు జిల్లా వాసి అయిన అంబటికి ఇంగ్లండ్‌తో జరిగే రెండు టి20ల సిరీస్‌లో ఆడేందుకు అవకాశం దక్కింది. వెన్ను నొప్పితో అర్థారంతరంగా జట్టుకు దూరమైన బ్యాట్స్‌మన్ మనోజ్ తివారి స్థానంలో రాయుడుకు చోటు కల్పించినట్టు బీసీసీఐ కార్యదర్శి సంజయ్ జగ్దాలే తెలిపారు. ఇంత వరకు అంతర్జాతీయ క్రికెట్ కి ఎంపిక కాని ఈ యువ క్రికెటర్ ఈసారి ఎంపిక కావడంతో  తొలిసారి జాతీయ జట్టుకు ఎంపికైనట్టయింది. వికట్ కీపర్ గా, బ్యాట్స్ మెన్ గా ఎంతో పేరు సంపాదించుకున్న ఈ యువ క్రికెటర్ కెరీర్ ఎన్నో ఒడిదొడులకు గురైంది. కెరీర్ ఆరంభంలో హైదరాబాద్ తరఫున రంజీల్లో ఆడాడు. అనంతరం ఆంధ్రకు ప్రాతి నిధ్యం వహించాడు. రాయుడు గత మూడేళ్లుగా ఐపీఎల్‌లో ముంబై ఇండియన్స్‌కు ప్రాతినిధ్యం వహిస్తున్నాడు. ఈ యువ బ్యాట్స్‌మన్ 77 ఫస్ట్‌క్లాస్ మ్యాచ్‌ల్లో 43.55 సగటుతో 4748 పరుగులు సాధించాడు. ఇందులో 13 సెంచరీలున్నాయి. 79 టి20ల్లో 122.16 స్ట్రయిక్ రేట్‌తో 1725 పరుగులు చేశాడు. ఇంత కాలం తరువాత అయినా అంబటి రాయుడికి అవకాశం రావడంతో ఆనందానికి అవధులు లేకుండా పోయాయి. వచ్చిన అవకాశాన్ని సద్వినియోగం చేసుకుంటానని చెబుతున్నాడు ఈ యువ క్రికెటర్.