Posted: 08/28/2012 08:43 PM IST

అథ్లెట్ చేతినుంచి జాలువారిన జావెలిన్ ఓ క్రీడా అధికారి ప్రాణాలు బలిగొంది. అథ్లెట్ ఎంతదూరం వేశాడో నిర్ధారించే జడ్జి.. జావెలిన్ గుచ్చుకోవడంతో తుదిశ్వాస విడిచాడు. ఈ విషాదకర సంఘటన జర్మనీలో చోటుచేసుకుంది. వివారాల్లోకెళితే.. జర్మనీలోని డస్సెల్డార్ఫ్‌లో జరుగుతున్న యూత్ అథ్లెటిక్స్ మీట్‌లో జావెలిన్ ఈవెంట్‌కు అనుభవజ్ఞుడైన 74 ఏళ్ల డైటర్ స్ట్రాక్ న్యాయ నిర్ణేతగా వ్యవహరించాడు. అథ్లెట్ జావెలిన్ ఎంతదూరం విసిరాడో కచ్చితంగా నిర్ధారించడం స్ట్రాక్ బాధ్యత. ఆదివారం రాత్రి జరిగిన జావెలిన్ పోటీల్లో ఓ అథ్లెట్ విసిరిన జావెలిన్ అనుకోకుండా స్ట్రాక్‌కు గుచ్చుకుంది. దీంతో అక్కడి అధికారులు అతణ్ని హుటాహుటిన ఆస్పత్రికి తరిలించారు. అయితే కొన్ని గంటలపాటు మృత్యువుతో పోరాడిన స్ట్రాక్ సోమవారం ఉదయం తుదిశ్వాస విడిచాడు. ఈ విషయాన్ని డస్సెల్డార్ఫ్ పోలీసులు వెల్లడించారు. 15 ఏళ్ల అథ్లెట్ వేసిన జావెలిన్ స్ట్రాక్‌కు గుచ్చుకుని ప్రాణాలు కోల్పోయాడని.. ఈ వ్యవహారంలో దర్యాప్తు చేపడుతున్నామని పోలీసులు వెల్లడించారు. అయితే అథ్లెటిక్స్ నిర్వాహకులు మాత్రం ఇది ప్రమాదవశాత్తు జరిగిన సంఘటనే అని చెబుతున్నారు.