కాలా రూమర్స్.. హైప్ కోసమేనా?

Posted: 06/06/2017 11:16 AM IST

కబాలితో తన మార్కెట్ పరిధిని పెంచేసుకున్న రజనీ ముసలి డాన్ గా చేసిన ఓపెనింగ్ మ్యాజిక్ ఇప్పుడప్పుడే మరిచిపోయే ప్రసక్తే కనిపించటం లేదు. అందుకు తన రాబోయే చిత్రాలను కూడా మల్టీ లాంగ్వేజ్ మూవీలుగానే రిలీజ్ చేయాలని డిసైడ్ అయ్యాడు. అంతేకాదు అందుకోసం ఇతర భాషా నటులను కూడా తన సినిమాలో పెట్టుకునే పనిలో ఉన్నాడు.

ఇప్పటికే కాలా కరికాలన్ లో నానా పటేకర్, హ్యుమా ఖురేషీలను సెలక్ట్ చేసిన దర్శకుడు పా రంజిత్ ఇప్పుడు మరో సౌత్ స్టార్ హీరోను కూడా ఇందులో నటింపజేసే ఆలోచనలో ఉన్నాడంట. మళయాళపు మెగాస్టార్ మమ్ముటితో ఇప్పటికే చర్చలు జరిగాయని, త్వరలో సెట్స్ లో జాయిన్ అవుతాడని రెండు రోజులుగా వార్తలు చక్కర్లు కొడుతున్నాయి.గతంలో వీరిద్దరు దళపతి చిత్రంలో నటించిన విషయం తెలిసిందే. కానీ, కాలా కరికాలన్ విషయంలో ఎక్కడా క్లారిటీ మాత్రం కనిపించటం లేదు.

గతంలో మమ్ముటి రాజ్యాంగ పిత అంబేద్కర్ బయోపిక్ లో నటించిన విషయం తెలిసిందే. ఇప్పుడు కాలాలో కూడా ఇదే తరహా రోల్ పోషిస్తున్నాడంటూ అప్పటి చిత్రాలను వైరల్ చేస్తున్నారు. ఇదిలా ఉంటే ధనుష్ కూడా ఓ గెస్ట్ రోల్ లో కనిపించబోతున్నాడని టాక్ వినిపిస్తోంది.  పబ్లిసిటీ స్టంట్ లో భాగంగానే చిత్ర నిర్మాతలు(ధనుష్) ఈ విషయంలో సైలెంట్ గా ఉంటున్నట్లు చెప్పుకుంటున్నారు. అయితే ముంబై లో ప్రస్తుతం షూటింగ్ జరుపుకుంటున్న ఈ చిత్రానికి సంబంధించి వర్కింగ్ స్టిల్స్ రోజూ బయటికి వస్తూనే ఉన్నాయి. ఈ నేపథ్యంలో మమ్ముటి సెట్స్ లో జాయిన్ అయితే గనుక ఆ వార్త వెంటనే బయటికి వచ్చే అవకాశం ఉంది.