దాసరిది సహజ మరణం కాదా?

Posted: 05/31/2017 03:57 PM IST

దర్శకరత్న దాసరి నారాయణ రావు తీవ్ర అనారోగ్యం పాలై ఆస్పత్రిలో మృతి చెందిన విషయం తెలిసిందే. అయితే కొత్త కొత్త వ్యవహారాలు వెలుగులోకి రావటంతో ఆయన మరణంపై లేనిపోని డౌట్లు క్రియేట్ అవుతున్నాయి. ఓవైపు దిగ్గజ దర్శకుడి నిష్క్రమణపై సినీలోకం శోకసంద్రంలో ఉంటే.. మరోవైపు కుటుంబంలోని అంతర్గత కలహాలు కొత్త కోణాన్ని బయటకు తీస్తున్నాయి.

దాసరి చనిపోయిన కొన్ని గంటల్లోనే ఆయన పెద్ద కొడుకు తారక ప్రభు భార్య సుశీల మీడియా ముందుకొచ్చి సంచలన వ్యాఖ్యలు చేసింది. తమ కుటుంబంలో ఇంకా ఆస్తి పంపకాలు జరగలేదని.. తనకు అంతా సెటిల్ చేస్తానని చెప్పిన మామ దాసరి అంతలోనే మృతి చెందారని ఆమె ఆవేదన వ్యక్తం చేసింది. సుశీల.. కొన్నేళ్లుగా ఆ కుటుంబానికి దూరంగా ఉంటోంది. పదేళ్ల కిందటే ఆమె భర్తపై వరకట్న వేధింపుల కేసు పెట్టింది. తర్వాత కొడుకు దాసరి నారాయణరావు(మనవడికి ఆయన పేరే పెట్టారు)ను కలిసి ఆమె వేరుగా ఉంటోంది.

రీసెంట్ గా బర్త్ డే సందర్భంగా కలిసిన తనతో రెండు వారాల్లో సర్జరీ అంతా సెటిల్ చేస్తానని దాసరి అన్నాడని సుశీల చెప్పింది. కానీ ఇంతలోనే ఆయన తనకు న్యాయం చేయకుండానే వెళ్లిపోయారని ఆమె అంది. తాను ఆసుపత్రిలో దాసరిని చూడ్డానికి వెళ్తే.. లోపలికి వెళ్లకుండా అడ్డుకున్నారని.. అందుకే ఆయన మరణంపై తనకు అనుమానాలున్నాయని ఆమె ఆరోపించింది. ఈ దశలో దాసరి అంత్యక్రియలు హడావుడిగా ముగియటంపై కూడా అనుమానాలు వ్యక్తం చేస్తున్నారు పలువురు.