అభిమానులకు షాకిచ్చిన సాయిపల్లవి

Posted: 02/11/2019 10:05 PM IST

తన అభినయంతోనే అందరినీ ఆకట్టుకుంటూ.. అవకాశాలను అందిపుచ్చుకుంటూ వస్తోన్న ఫిదా అమ్మాయి సాయిపల్లవి అటు తమిళంతో పాటు ఇటు తెలుగుతో పలు చిత్రాలు చేస్తూ బిజీగా ఉంది. అయితే తాజాగా సాయిపల్లవి తన అభిమానులకు షాకిచ్చే నిర్ణయాన్ని ప్రకటించింది. అయితే ఇది తాత్కాలికమేనా.. లేక శాశ్వతమా.? అన్నది మాత్రం కాలమే తేల్చాల్సివుంది.
 
మలయాళ 'ప్రేమమ్'తో ఎంట్రీ ఇచ్చి అక్కడ మలర్ గా భలే పాపులర్ అయింది సాయి పల్లవి. ఆ క్రెడిట్ తో అమ్మడికి తెలుగులో ఎంట్రీ ఈజీగా దొరికింది. శేఖర్ కమ్ముల 'ఫిదా'తో అందరినీ ఫిదా చేసేసి టాలీవుడ్లో మరిన్ని అవకాశాలు అందుకుంది సాయిపల్లవి. హీరోయిన్ గా దూకుడు మీదున్న అమ్మాయిగారు.. ఇటీవల పెళ్ళిపై స్పందించిన తీరు మాత్రం అందరికి షాక్ ఇచ్చింది. అమ్మడు పెళ్ళే చేసుకోకుండా జీవితాంతం కన్యగానే ఉండిపోతుందట.
 
ఇటీవల ఓ ఇంటర్వ్యూలో పెద్దలు కుదిర్చిన పెళ్ళా? ప్రేమ వివాహమా? అని సాయి పల్లవిని ప్రశ్నించగా పెళ్ళీ గిళ్ళీ జాన్తా నై.. తల్లిదండ్రులను కంటికి రెప్పలా చూసుకుంటూ జీవితాంతం పెళ్ళే చేసుకోననేసింది సాయిపల్లవి. పెళ్ళికి దూరంగా ఉండాలనే సాయిపల్లవి నిర్ణయానికి నెటిజెన్స్ నుంచి మిశ్రమ స్పందన లభించింది. అవకాశాల కోసం ఎన్నడూ హద్దుదాటని సాయిపల్లవిని కొందరు అభినందిస్తే మరికొందరు సమర్ధించారు. మరి సాయిపల్లవికి మును ముందు పెళ్ళి మీద మోజు పుడుతుందో లేదో చూడాలి.