రాజధానికి 1000.. లెఫ్ట్ పార్టీలకు 10 : చంద్రబాబు ఆగ్రహం

Posted: 03/05/2015 04:15 PM IST

గతకొన్నిరోజుల నుంచి వామపక్ష పార్టీలు తమ కార్యాలయాల నిర్మాణం కోసం పదిఎకరాల భూమిని కేటాయించాలంటూ ప్రభుత్వంపై ఒత్తిడి చేస్తున్నారు. మరోవైపు రాజధాని నిర్మాణం కోసం రైతుల నుంచి భూములను లాక్కుంటున్నారని, ఏపీ ప్రభుత్వం అనవసరంగా రాద్ధాంతం సృష్టిస్తోందని ఆ పార్టీలు ఆరోపణలు చేశారు. రాజధానికి కేవలం వెయ్యెకరాలు అయితే సరిపోతుందని అభిప్రాయం వ్యక్తం చేశారు.

అయితే.. రాజధాని విస్తీర్ణంపై వామపక్ష పార్టీలు చేస్తున్న ఈ ప్రకటనలపై ఏపీ సీఎం చంద్రబాబునాయుడు తీవ్ర ఆగ్రహం వ్యక్తం చేశారు. జపాన్ ప్రతినిధి బృందంతో సమావేశం సందర్భంగా మాట్లాడిన ఆయన.. రాజధాని నిర్మాణంపై కీలక వ్యాఖ్యలు చేస్తూ, వామపక్ష పార్టీలపై ఫైర్ అయ్యారు. ఈ నేపథ్యంలోనే ఆయన మాట్లాడుతూ.. తమ కార్యాలయాలకోసం పదెకరాలు కావాలని అడిగే వామపక్షాలు, కొత్త రాజధానికి మాత్రం వెయ్యెకరాలు చాలని ఎలా చెబుతాయని ప్రశ్నించారు. కొత్త రాజధాని నిర్మాణంపై రాజకీయ పార్టీలకు ఓ విజన్ వుండాలని చంద్రబాబు పేర్కొన్నారు.

అలాగే.. రాష్ట్రప్రజల ఉజ్వల భవిష్యత్తును దృష్టిలో పెట్టుకునే నవ్యాంధ్ర రాజధానికి రూపకల్ప చేస్తున్నామని ఆయన ప్రకటించారు. జూన్‌లో రాజధాని మాస్టర్‌ప్లాన్‌ అందుతుందని వెల్లడించారు. రాజధాని నిర్మాణానికి సింగపూర్‌, జపాన్‌ సహకారం ఉంటుందన్నారు. పెట్టుబడుల కోసం అన్ని దేశాలను ఆహ్వానిస్తున్నట్లు తెలిపారు. నిర్ణీత వ్యవధిలోనే ప్రాజెక్టులకు అనుమతి ఇస్తామని బాబు పేర్కొన్నారు.