మంత్రులే బెదిరిస్తున్నారు : కిషన్ రెడ్డి

Posted: 03/04/2015 05:43 PM IST

రెండు తెలుగురాష్ట్రాల్లోనూ ఫీజు రీయింబర్స్ మెంట్ విషయంపై తీవ్ర వివాదాలు రేగుతున్న విషయం తెలిసిందే! విభజన జరిగినప్పటి నుంచి సాగుతున్న ఈ ఫీజు వివాదం ఇంతవరకు ఓ కొలిక్కి రాలేదు. ఆ వ్యవహారాలెలా వున్నా.. గత రెండేళ్ల నుంచి ఫీజు రీయింబర్స్ మెంట్ చెల్లించడం లేదు. ఈ విషయంపై బీజేపీ తెలంగాణ అధ్యక్షుడు కిషన్ రెడ్డి ఆగ్రహం వ్యక్తం చేశారు.

ఆస్తి పన్ను పెంపును నిరసిస్తూ ఇందిరాపార్కు వద్ద బీజేపీ ఎమ్మెల్యేలు బుధవారం ఒక రోజు దీక్షి చేపట్టారు. ఈ నేపథ్యంలోనే కిషన్ రెడ్డి ఫీజు విషయంపై మాట్లాడుతూ.. గత రెండేళ్ల నుంచి ఫీజు రీయింబర్స్ మెంట్ చెల్లించడం లేదని ఆరోపించారు. ఈ విషయానికి సంబంధించి ప్రైవేటు కాలేజీల యాజమాన్యాలను రాష్ట్రమంత్రులే బెదిరిస్తున్నారని మండిపడ్డారు. కోర్టు ఇచ్చిన ఆర్డర్స్ ను ప్రభుత్వం బేఖాతరు చేసిందని అన్నారు.

ఇష్టారాజ్యంగా వ్యవహరిస్తే ప్రభుత్వానికి ప్రజలు షాక్ ఇస్తారని కిషన్ రెడ్డి హెచ్చరించారు. ఇప్పటికైనా కాలయాపన చేయకుండా నిర్ణయాలు తీసుకోవాల్సిన బాధ్యత ప్రభుత్వంపై వుందని ఆయన సూచించారు.