వెనక్కు తగ్గేది లేదు : మోదీ

Posted: 02/24/2015 01:29 PM IST

పార్లమెంటు ఉభయసభల్లో భాగంగా అధికారపక్షం ప్రవేశపెట్టిన భూసేకరణ బిల్లు.. పెను చర్చకు దారీతీసే దిశగా కనిపిస్తోంది. ఇప్పటికే ఈ బిల్లుకు చేసిన సవరణలపై విపక్షాలతోపాటు సామాజిక ఉద్యమకార్యకర్త అన్నా హజారే యుద్ధం ప్రకటించగా.. తాము మాత్రం వెనక్కి తగ్గేది లేదంటూ బీజేపీ ఖరాఖండీగా ప్రకటించేసింది. తాము ప్రవేశపెట్టిన ఆ బిల్లు భేషుగ్గానే వుందని, అందుకు మద్దతుగా అందరూ మంత్రులు సన్నద్ధమవ్వాలంటూ ఆ పార్టీ వెల్లడించింది. ఈ నేపథ్యంలో ప్రధాని మోదీ కూడా తనదైన అభిప్రాయాన్ని వెల్లడించారు. ఈ బిల్లుపై అస్సలు వెనక్కు తగ్గేదేలేదని ఆయన తేల్చి చెప్పేశారు.

పార్లమెంటు రెండోరోజు సమావేశాల ప్రారంభానికి ముందు బీజేపీ పార్లమెంటరీ బోర్డు సమావేశం జరిగింది. ఈ నేపథ్యంలోనే బిల్లుపై మాట్లాడిన మోదీ.. ఆ అంశంపై సభలో ఏ విధంగా అనుసచించాలోనన్న వైఖరిపై పార్టీ సభ్యులకు దిశానిర్దేశం చేశారు. అలాగే బిల్లు భేషుగ్గా వుందని, వెనక్కు తగ్గేది లేదని ఆయన ప్రకటించారు. ఆ దిశగానే పార్టీ సభ్యులు, మంత్రులు సన్నద్ధమై సమావేశాలకు హాజరుకావాలని పిలుపునిచ్చారు.

* భూసేకరణ బిల్లు భేషుగ్గా వుంది. ఆ బిల్లుకు చేసిన సవరణలు బాగున్నాయి.
* ఎవరైనా దీనిపై వ్యతిరేకత భావాన్ని వ్యక్తపరిచినా అందుకు వెనక్కు తగ్గేది లేదు.
* ఇందుకు పార్టీ మంత్రులు, సభ్యులు కూడా సహకరిస్తారని నేను భావిస్తున్నాను అంటూ మోదీ పిలుపునిచ్చారు.