తన్నుకుపోతుంటే చేతులు చాచి కూర్చునేది లేదు : లగడపాటి

Posted: 11/15/2013 08:32 PM IST

రాష్ట్రాన్ని సమైక్యంగా ఉంచేందుకు ఎలాంటి త్యాగాలకైనా సిద్ధంగా ఉన్నట్లు ఎంపీ లగడపాటి రాజగోపాల్ అన్నారు. ఈరోజు ఉదయం కృష్ణా జిల్లా వీరులపాడు రచ్చబండలో పాల్గొన్న లగడపాటి మాట్లాడుతూ సీమాంధ్ర ప్రజల వల్లే హైదరాబాద్‌లో అభివృద్ధి జరిగిందన్నారు. రాజధానిగా భావించే పలు కంపెనీలు, విద్యాసంస్థలు పెట్టారని అలాంటిది రాజధాని వదిలిపోవాలంటే సహించేది లేదని ఎంపీ లగడపాటి స్పష్టం చేశారు.

 

రాష్ట్ర విభజన విషయంలో రాష్ట్రపతి ఆమోదం మేరకే పార్టమెంట్‌లో బిల్లు ప్రవేశ పెట్టాలని లగడపాటి రాజగోపాల్ అన్నారు. రాష్ట్రానికి ఈ పరిస్థితి రావడానికి రాజకీయ పార్టీలే కారణమన్నారు. రాష్ట్ర విభజన విషయంలో సీఎం కిర ణ్‌కుమార్‌రెడ్డి తన పదవిని సైతం వదులుకోవాడానికి సిద్ధంగా ఉన్నారన్నారు. ప్రజలందరి భాగస్వామ్యంతో అభివృద్ధి చెందిన హైదరాబాద్ అందరిదని, దానిని తన్నుకుపోతుంటే చేతులు చాచి కూర్చునేది లేదన్నారు. రాష్ట్రానికి వచ్చే ఆదాయంలో 60 శాతం ఆదాయం హైదరాబాదు నుంచి వస్తుందన్నారు.

 

ముఖ్యంగా విద్య, ఉద్యోగ, ఉపాధి అవకాశాలు హైదరాబాద్‌లో ఉండటం వల్ల అక్కడ అభివృద్ధి జరిగిందని చెప్పారు. యూపీఏ రాష్ట్ర విభజనలో దూకుడుగా ఉన్నప్పటికీ రాష్ట్ర సమైక్యత కోసం సీమాంధ్ర కాంగ్రెస్ నాయకులమంతా అధిష్టానంపై తిరగబడతామని చెప్పారు. అసెంబ్లీలో సీఎం కిరణ్‌కుమార్‌రెడ్డి బిల్లును ఆమోదిస్తేనే విభజన జరగుతుంది తప్ప ఆమోదం లేకుంటే విభజన జరగదన్నారు. సీఎం కిరణ్ పదవిలోఉన్నంత కాలం విభజన ప్రసక్తే ఉండదన్నారు.