సుమన్

Posted: 05/01/2015 01:26 PM IST

Actor suman bollywood entry gabbar is back movie updates akshay kumar

దాదాపు నాలుగు దశాబ్దాల కెరీర్‌లో కథానాయకునిగా, సహాయ నటునిగా, ప్రతినాయకునిగా వంటి విభిన్న పాత్రల్లో నటుడు సుమన్ జీవం పోశారు. దేవుడి పాత్రల్లో కూడా ఆయన ప్రేక్షకులను మెప్పించారు. దక్షిణాది చిత్రపరిశ్రమలో తన ప్రస్థానాన్ని పదిలపరుచుకున్నాడు. ఇప్పుడు ‘గబ్బర్ ఈజ్ బ్యాక్’ సినిమాతో ఆయన హిందీ చిత్రసీమలోకి అడుగుపెట్టారు. తమిళ చిత్రం ‘రమణ’ (తెలుగులో ‘ఠాగూర్’) ఆధారంగా తెలుగు దర్శకుడు క్రిష్ దర్శకత్వంలో అక్షయ్‌కుమార్, శ్రుతీహాసన్ జంటగా రూపొందిన ఈ చిత్రంలో సుమన్ ప్రతినాయకునిగా నటించారు.

ఈ సందర్భంగానే ఆయన మాట్లాడుతూ.. ‘రజనీకాంత్‌ ‘శివాజీ’లో నేను విలన్‌గా నటించిన విషయం తెలిసిందే. ఆ చిత్రం హిందీలోనూ విడుదలైంది. అప్పుడు ఆ సినీరంగం నుంచి నాకు చాలా అవకాశాలు వచ్చాయి. కానీ.. ఓ మంచి చిత్రం ద్వారా పరిచయం అయితే బాగుంటుందనుకున్నా. అందుకే ఇన్నాళ్లు వెయిట్ చేశాను. ‘గబ్బర్ ఈజ్ బ్యాక్’ సరైన సినిమా అనిపించి, వెంటనే అంగీకరించాను’ అంటూ తన బాలీవుడ్ ఎంట్రీ గురించి ఆయన వివరించారు. ఈ క్రమంలోనే నటుడు అక్షయ్ కుమార్ గురించి ఆయన కొన్ని ఆసక్తికర విషయాలను వెల్లడించారు. షూటింగ్ సమయంలో వీరిమధ్య జరిగిన సంభాషణలు, ఇతర వివరాలు తెలియపరిచారు.

ఈ నేపథ్యంలోనే ఆయన అక్షయ్ గురించి మాట్లాడుతూ.. ‘అక్షయ్‌కుమార్‌కీ మార్షల్ ఆర్ట్స్ తెలుసు. నాకూ వచ్చు. దాంతో ఫైట్ సీన్స్‌ని చాలా సహజంగా చేశాం. నాకు తెలిసి భారతీయ సినిమాలో రిస్క్ తీసుకుని ఫైట్స్ చేసేది అక్షయ్‌కుమారే. అటువంటి ఆయన అంత సులువుగా ఎవర్నీ అభినందించరట. ఆయనే స్వయంగా ‘ఈ వయసులో మీరు బాగా ఫైట్స్ చేస్తున్నారు’ అని నన్ను ప్రశంసించడం మరిచిపోలేను. ఈ ఏడాది హిందీ రంగానికి పరిచయం కావడం ఓ విశేషం అయితే, ఏకకాలంలో నాలుగు దక్షిణాది భాషల్లో రూపొందిన ‘రెడ్ అలర్ట్’లో నటించడం మరో విశేషం’ అన్నారు.