Posted: 03/06/2013 05:57 PM IST

పోలవరం టెండర్లను ట్రాన్స్‌స్ట్రాయ్-యూఈఎస్ జాయింట్ వెంచర్‌కు కట్టబెట్టిన వ్యవహారంలో సీఎం కిరణ్‌పై టీఆర్ఎస్ఎల్పీ ఉప నేత హరీశ్‌రావు తీవ్రస్థాయిలో విరుచుకుపడ్డారు. ఫోర్జరీపత్రాలతో టెండర్లలో పాల్గొన్న ట్రాన్స్‌స్ట్రాయ్ కంపెనీకి కాంట్రాక్టు ఎలా ఇస్తారని ప్రశ్నించారు. "ముఖ్యమంత్రి కిరణ్ ఆయనకు ఆయనే..నేను మిస్టర్ క్లీన్..మిస్టర్ పర్‌ఫెక్ట్ అని చెప్పుకుంటారు. అదే నిజమైతే..ఆయన డిఫెక్ట్ కాకపోతే..పోలవరం టెండర్లపై బహిరంగ చర్చకు సిద్ధం కావాలి, సీబీఐ విచారణకు ముందుకు రావాలి'' అని సవాల్ చేశారు.  అన్ని అక్రమాలను ఆధారాలతో సహా నిరూపిస్తామన్నారు. అప్పుడు కిరణ్ ముఖ్యమంత్రా లేక మురికిమంత్రా అన్న విషయం తేలుతుందని చెప్పారు. ట్రాన్స్‌స్ట్రాయ్ కంపెనీ సమర్పించిన పత్రాలు ఫోర్జరీవని రష్యా తేల్చిన తర్వాత కూడా దానికే టెండర్లు ఇవ్వటం వల్ల అంతర్జాతీయంగా భారత్ పరువు పోయిందన్నారు. దీనిపై కోర్టుకు వెళ్తామని, చివరిదాకా పోరాడుతామని స్పష్టం చేశారు. సీవీసీ, లోకాయుక్త సహా అన్ని రాజ్యాంగ సంస్థల దృష్టికి తీసుకెళ్తామన్నారు. ఈ వ్యవహారంపై ప్రధాన ప్రతిపక్షం టీడీపీ ఎందుకో మౌనంగా ఉందని అన్నారు. టెండర్లు పొందిన ట్రాన్స్‌స్ట్రాయ్-యూఈఎస్ జాయింట్ వెంచర్ కంపెనీ అనుభవ డాక్యుమెంట్లు ఫోర్జరీవని.. దీనిపై విచారణకు వెళ్లిన అధికారులు అదే కంపెనీ ఆతిథ్యం తీసుకుని చూసీ చూడనట్లు వదిలేశారని ఆయన ఆరోపించారు. పంజాబ్‌లో షాపూర్‌కండి డ్యాం కోసం ఇదే సంస్థ ఫోర్జరీ పత్రాలతో టెండర్లు దాఖలు చేయగా ఆ ప్రభుత్వం దాన్ని పక్కన పెట్టిందని, అలాంటిది మన ప్రభుత్వం మాత్రం వాళ్లను నెత్తిన పెట్టుకుందని విమర్శించారు. రాత్రికి రాత్రే పోలవరం టెండర్లు కట్టబెట్టాల్సిన అవసరం ఏముందని ఆయన ప్రశ్నించారు.