జనసేన లోకి జగ్గారెడ్డి మళ్లీనా?

Posted: 03/15/2017 05:18 PM IST

Jagga reddy agin in news with janasena sangareddy meeting

రెండు తెలుగు రాష్ట్రాల్లోనూ 2019 ఎన్నికల్లో పోటీ చేస్తానని పవన్ ప్రకటించటమే ఆలస్యం వెనువెంటనే గ్రౌండ్ స్థాయిలో ప్రయత్నాలు ప్రారంభమయ్యాయని అర్థమైపోతుంది. జనసేన కేవలం ఆంధ్రా పార్టీగానే మారిపోతుందా? అన్న అంచనాలను పటాపంచల్ చేస్తూ ఇక్కడ కూడా పోటీ చేస్తానని ప్రకటించటం, పైగా త్వరలో సంగారెడ్డిలో పర్యటిస్తానని చెప్పటంతో ఓ సరికొత్త వాదన తెరపైకి వచ్చింది.

సంగారెడ్డిలో ఈ సభ ఏర్పాటు వెనుక కాంగ్రెస్ పార్టీ మాజీ ఎమ్మెల్యే జగ్గారెడ్డి హస్తం ఉన్నట్లు తెలుస్తోంది. ఎందుకంటే, పవన్ తో జగ్గారెడ్డికి సాన్నిహిత్యం బాగానే ఉంది. సంగారెడ్డి లో పవన్ సభ ఏర్పాట్లు దగ్గర నుంచి జన సమీకరణ వరకు తెర వెనుక ఉన్న వ్యక్తి జగ్గారెడ్డే నని వార్తలు వినిపిస్తున్నాయి. అయితే జనసేన లోకి జగ్గారెడ్డి అన్న హెడ్డింగ్ రెండేళ్ల నుంచే నానుతూ వస్తోంది. అవసరమైతే పవన్ తో కలిసి పని
చేసేందుకు సిద్ధమని ఆ సమయంలోనే జగ్గారెడ్డి ఓ స్టేట్ మెంట్ ఇవ్వగా, ఆపై ఏకంగా ఇద్దరూ ఒకటి రెండు సార్లు భేటీ కూడా అయ్యారు.

ఈ నేపథ్యంలో సంగారెడ్డి లో నిర్వహించనున్న భారీ సభలో జగ్గారెడ్డి జనసేన పార్టీ కండువా కప్పుకోనున్నారని తెలుస్తోంది. మరోవైపు పార్టీని నడిపించాలంటే సీనియర్ నాయకత్వం అవసరం కూడా ఉందని చెప్పిన పవన్ జగ్గారెడ్డి చేరికను అంగీకరించాడనే వాదన కూడా వినిపిస్తోంది. ఈ మాజీ ఎమ్మెల్యే జనసేనలో చేరే విషయంపై సస్పెన్స్ వీడేందుకు ఎక్కువ రోజులు పట్టదేమో. అదే జరిగితే సంగారెడ్డిలో టీఆర్ఎస్ కు కాస్త
ఇబ్బందికర పరిణామాలు ఎదురయినట్లే... !