‘బాహుబలి2’ కోసం బాలీవుడ్ ఆరాటం

Posted: 02/05/2016 04:45 PM IST

Bollywood producers trying for baahubali the conclusion rights

ప్రముఖ దర్శకుడు ఎస్.ఎస్.రాజమౌళి దర్శకత్వంలో వచ్చిన ‘బాహుబలి’ చిత్రం ఇటీవలే ప్రపంచ వ్యాప్తంగా విడుదలై సంచలన విజయం సాధించిన విషయం తెలిసిందే. భారీ కలెక్షన్లను రాబడుతూ కొత్త రికార్డులను క్రియేట్ చేసింది. ‘బాహుబలి’ చిత్రం కేవలం హిందీ వర్షెన్ లోనే 100కోట్లు కొల్లగొట్టి రికార్డ్ క్రియేట్ చేసింది.

హిందీలో ‘బాహుబలి’ హక్కులను ప్రముఖ దర్శకనిర్మాత కరణ్ జోహర్ సొంతం చేసుకున్నాడు. హిందీలో కరణ్ జోహర్ ‘బాహుబలి’ని చాలా గ్రాండ్ గా విడుదల చేసారు. అలాగే పబ్లిసిటీ పరంగా కూడా మోత మోగించేసాడు. ‘బాహుబలి’ హిందీ వర్షెన్ విజయంలో కరణ్ జోహర్ పాత్ర కూడా కాస్త వుందని చెప్పుకోవచ్చు.

‘బాహుబలి’ చిత్రం సంచలన విజయం సాధించడంతో ‘బాహుబలి- కంక్లూజన్’పై భారీ అంచనాలు నెలకొన్నాయి. ఈ సినిమా హక్కుల కోసం చాలా పోటీ ఏర్పడుతోంది. అయితే ‘బాహుబలి- కంక్లూజన్’ హిందీ హక్కుల కోసం బాలీవుడ్ నిర్మాతలు తెగ ప్రయత్నాలు చేస్తున్నారు. ఇటీవలే ఓ బాలీవుడ్ ప్రముఖ నిర్మాత ‘బాహుబలి’ చిత్ర నిర్మాతలను దాదాపు 150 కోట్ల భారీ ఆఫర్ తో కలిసారట. కానీ ఇప్పుడేమి చెప్పలేమంటూ ఆ నిర్మాతను ‘బాహుబలి’ చిత్ర నిర్మాతలు పంపించేసారని తెలిసింది.

తాజా సమాచారం ప్రకారం ‘బాహుబలి- కంక్లూజన్’ హిందీ హక్కులను కూడా కరణ్ జోహర్ కే ఇవ్వాలనే ఉద్దేశ్యంతో దర్శకుడు రాజమౌళి భావిస్తున్నట్లుగా తెలుస్తోంది. ఎందుకంటే ‘బాహుబలి’ సినిమా హిందీ వర్షెన్ విడుదల సమయంలో కరణ్ జోహర్ అందించిన సహకారం మరువలేదని రాజమౌళి భావిస్తున్నాడు. అందుకే ఇప్పుడే ‘బాహుబలి-కంక్లూజన్’ బిజినెస్ గురించి ఆలోచించడంలేదు ‘బాహుబలి’ దర్శకనిర్మాతలు.

ప్రస్తుతం ఈ చిత్ర షూటింగ్ శరవేగంగా జరుగుతోంది. ప్రభాస్, అనుష్క, రమ్యకృష్ణ, రానా, నాజర్, సత్యరాజ్ తదితరులు షూటింగ్ లో పాల్గొంటున్నారు. ‘బాహుబలి’ సినిమా విజయం వల్ల ఈ సెకండ్ పార్ట్ పై అంచనాలు తారాస్థాయిని చేరుకున్నాయి. మరి ఈ సినిమా ఎప్పుడు విడుదలవుతుందో, ఎలాంటి విజయం సాధించనుందో త్వరలోనే తెలియనుంది.