మెగా కంపౌండ్ బయటకా.. లోపలికా?

Posted: 09/22/2014 10:20 AM IST

ఎవరైనా కొత్తదనమే కోరుకుంటారు. కొత్తగా లేకపోతే.. ఏముందిలే అనుకుంటారు. ఆగడు సినిమాను చూస్తే ప్రేక్షకుల మనస్సు ఏం కోరుకుంటోందో అర్ధం అవుతుంది. మహేష్ సినిమా అంటే ఓ పోలిస్ క్యారెక్టర్ అనేలా వరుసగా అదే పోలిస్ గెటప్ వేశారు. హీరో మాట్లాడే యాస మారింది తప్ప కధ మారలేదు. కాబట్టి ఈ సినిమాపై భిన్న స్పందనలు వస్తున్నాయి. ముఖ్యంగా శ్రీను వైట్ల కధ ఎంపికపై తీవ్ర అసంతృప్తి వ్యక్తం అవుతోంది. ఈ సినిమాలో గత మూవీకంటే కొత్తగా ఏముంది అని అంతా ప్రశ్నిస్తున్నారు. ఇలా కొత్తదనం లేకపోవటం వల్ల శ్రీనుకు కొత్త ఇబ్బందులు వస్తున్నాయి.

రామ్ చరణ్ తో శ్రీనువైట్ల ఓ సినిమా చేయాలని చూస్తున్నాడు. అయితే ‘ఆగడు’ రిజల్ట్ నేపధ్యంలో రొటిన్ కధలు వద్దని ఆయన సన్నిహితులు సూచిస్తున్నారట. ఇదే జరిగితే వైట్ల చాన్స్ పోగొట్టుకున్నట్లే. ఒక కధ చెప్పేయగానే మెగా ఫ్యామిలి వెంటనే ఒప్పేసుకోదని అందరికి తెలుసు. కధలోని లోపాలు, ప్రజల స్పందన, కమర్షియల్ ఎలిమెంట్ అన్ని చూసుకుని.., పెద్దలతో చర్చించాకే సినిమాలు ఓకే చేస్తారు. అలాంటి కంపౌండ్ లోకి పాత చింతకాయ పచ్చడను తీసుకెళ్ళినట్లు అవే పాత కధలతో వెళ్తే ఖచ్చితంగా బయటకు రావటం ఖాయంగా తెలుస్తోంది.

మరి వరుసగా పోలిస్ స్టోరిలు చేసి కామెడి అటాచ్ చేస్తున్న శ్రీనువైట్ల ఇప్పుడు ఎలా ఎదుర్కుంటారు. రామ్ చరణ్ సినిమా అంటే చెర్రి మొదలుకుని చిరంజీవి, అరవింద్, ఇతర అనుభవం ఉన్నవారంతా కలిసి చర్చించి నిర్ణయం తీసుకుంటారు. అలాంటి వారింటికి వెళ్ళి కధ చెప్పి ఒప్పించుకోవటం ఓ సాహసం. పక్కా ప్లానింగ్, పర్ ఫెక్ట్ స్ర్కిప్టుతో వెళ్తేనే విజయం సాధించి బయటకు రావటం మామూలు విషయం కాదు. మరి ఈ సాహసంలో మరి వైట్ల గెలుస్తాడా.. లేక వెనుతిరిగి వస్తాడా అనేది చూడాలి.

కార్తిక్