డైరెక్టర్ సారూ... మహేష్ ఫ్యాన్స్ భయపడుతున్నారు!

Posted: 08/26/2014 03:33 PM IST

శ్రీనువైట్ల దర్శకత్వంలో మహేష్ హీరోగా నటిస్తున్న ‘ఆగడు’ సినిమా తుదిదశకు చేరుకుంది. థమన్ సంగీతం అందిస్తున్న పాటలను ఈనెల 30న విడుదల చేయనున్నారు. తమన్నా హీరోయిన్ గా నటిస్తున్న ఈ సినిమాలో శృతిహాసన్ ఓ ఐటెం సాంగులో నటించనుంది. త్వరలోనే ఈ చిత్రాన్ని ప్రేక్షకుల ముందుకు తీసుకురానున్నారు. ఈ సినిమా తర్వాత మహేష్ కొరటాల శివ దర్శకత్వంలో ఓ సినిమా చేయనున్నాడు.

ఇటీవలే ఈ చిత్ర మూహూర్త కార్యక్రమాలు కూడా జరిగాయి. అయితే ఈ సినిమాలో మహేష్ పక్కా మాస్ హీరో కనిపించబోతున్నాడట. అయితే ఇందులో మహేష్ డ్యూయల్ రోల్ చేయబోతున్నాడని తాజా సమాచారం. ఈ వార్త తెలిసిన క్షణం నుంచి మహేష్ అభిమానులు భయపడుతున్నారు. ఎందుకంటే... మహేష్ గతంలో నటించిన ‘నాని’ సినిమాలో చివర్లో తండ్రి కొడుకులుగా డ్యూయల్ రోల్ లో నటించాడు. ఆ సినిమా అట్టర్ ఫ్లాప్ అయ్యింది.

ఇపుడు మహేష్ మళ్లీ ఈ కొత్త సినిమాలో డ్యూయల్ రోల్ చేస్తే ఈ సినిమా కూడా ఫ్లాప్ అవుతుందేమోనని అభిమానులు భయపడుతున్నారు. అసలే ‘మిర్చి’ వంటి బ్లాక్ బస్టర్ హిట్ చిత్రం తర్వాత భారీ క్రేజు ఏర్పడిన కొరటాల శివ దర్శకత్వంలో మహేష్ చేస్తున్న సినిమా కావడం వల్ల అభిమానుల్లో కూడా భారీ అంచనాలు నెలకొన్నాయి. మరి ఇలాంటి పరిస్థితుల్లో మళ్లీ ఏమైనా ప్రయోగాలు చేస్తే ‘1 నేనొక్కడినే’ వలే ఫ్లాప్ అవుతుందేమోనని అభిమానులు భయపడతున్నారు.

అయితే ఈ విషయంపై ఇంకా ఎలాంటి అధికార ప్రకటన వెలువడలేదు. దర్శకుడు ఈ పాత్ర గురించి ఇంకా ప్రకటించలేదు. త్వరలోనే అన్ని వివరాలు అధికారికంగా తెలియనున్నాయి. మైత్రి మూవీస్ బ్యానర్లో తెరకెక్కుతున్న ఈ చిత్రానికి దేవిశ్రీప్రసాద్ సంగీతం అందించనున్నాడు. సెప్టెంబర్ నుంచి రెగ్యులర్ షూటింగ్ జరుపుకోనున్న ఈ చిత్రంలో శృతిహాసన్ హీరోయిన్ గా నటించనుంది.