సినీ పరిశ్రమలో ఏ వ్యవహారం ఎప్పుడు ఎలాంటి మలుపులు తీసుకుంటుందో ఎవరూ ఊహించలేరు. ముఖ్యంగా కథానాయికల ప్రేమ వ్యవహారాల తాలూకు గాసిప్స్ ఎప్పుడూ పరిశ్రమలో పరిభ్రమిస్తూ వుంటాయి. ఆ తరహాలోనే ప్రభుదేవా-నయనతార ప్రేమ వ్యవహారం రోజుకో మలుపు తిరుగుతోంది. ఈ జంట మధ్య విబేధాలు తలెత్తాయని, ప్రభుదేవా వ్యవహార శైలి నచ్చక నయనతార అతనికి దూరంగా వుంటుందని గత కొంతకాలంగా చైన్నై నుంచి వార్తలు వెలువడుతున్న విషయం తెలిసిందే. అంతేకాదు ఈ మధ్యకాలంలో నయనతార వరుస సినిమాలను అంగీకరించడం కూడా ఈ పుకార్లకు బలాన్నిచ్చింది. మీడియాలో వీరిద్దరి బ్రేక్‌ అప్ గురించి వార్తలు వచ్చాయే కానీ ఈ జంట ఎప్పుడూ ఇటువంటి పుకార్లను ఖండించలేదు.

దీంతో ఈ వివాదాలకు తెరదించాలనే కృత నిశ్చయంతో ప్రభుదేవా వున్నట్లు ఆయన సన్నిహితులు చెబుతున్నారు. అందుకే స్వీయ దర్శకత్వంలో ఆయనే హీరోగా నటిస్తూ ఓ సినిమాను తెరకెక్కించే సన్నాహాల్లో ప్రభు వున్నాడట. ఈ చిత్రంలో కథానాయికగా నయనతార నటిస్తుందని చైన్నై సినీ వర్గాలు చెబుతున్నాయి. తామిద్దరం విడిపోయామని మీడియాలో వస్తోన్న పుకార్లకు గట్టి సమాధానంగానే ఈ చిత్ర నిర్మాణానికి ప్రభుదేవా పూనుకున్నాడని ఆయన సన్నిహిత వర్గాలు అంటున్నాయి.