నాగ్ సొగ్గాడితో రమ్యకృష్ణ మళ్లీ బిజీ

Posted: 06/30/2015 12:27 PM IST

Ramya krishna again join in soggade chinni nayana movie shooting

అక్కినేని నాగార్జున నటిస్తున్న తాజా చిత్రం ‘సోగ్గాడే చిన్నినాయన’. ఈ చిత్రం ద్వారా కళ్యాణ్ కృష్ణ దర్శకుడిగా పరిచయమవుతున్నారు. ఇందులో నాగార్జున ద్విపాత్రాభినయం చేస్తున్నాడు. నాగార్జున సరసన రమ్యకృష్ణ, లావణ్య త్రిపాఠీలు హీరోయిన్లుగా జతకడుతున్నారు.

ఇప్పటికే ఈ చిత్రానికి సంబంధించిన కొన్ని ఫోటోలు విడుదలై మంచి టాక్ ను సొంతం చేసుకున్నాయి. అయితే తాజాగా ఈ చిత్ర షూటింగ్ లోకి రమ్యకృష్ణ తిరిగి పాల్గొంది. మొన్నటి వరకు ‘బాహుబలి’ సినిమా కార్యక్రమాల్లో రమ్యకృష్ణ బిజీగా వుండటం వల్ల షూటింగ్ కు కాస్త బ్రేక్ పడింది. ప్రస్తుతం ఈ చిత్ర ఒక షెడ్యూల్ చెన్నైలో జరుగుతోంది.

సోషియో ఫాంటసీ తరహాలో ‘సోగ్గాడే చిన్నినాయన’ చిత్రం రూపొందనుంది. అన్నపూర్ణ స్టూడియోస్ పతాకంపై అక్కినేని నాగార్జున నిర్మిస్తున్న ఈ చిత్రానికి రాధామోహన్ కథ-స్ర్కీన్ ప్లేను అందిస్తున్నారు. ఈ చిత్రానికి సంబంధించిన మరిన్ని వివరాలు త్వరలోనే అధికారికంగా ప్రకటించనున్నారు.