మంత్రి చీప్ వ్యాఖ్యలపై రోజా ఫైర్

Posted: 07/04/2017 04:28 PM IST

ఆంధ్రప్రదేశ్ ఎక్సైజ్ శాఖా మంత్రి లిక్కర్ వ్యాఖ్యలపై తీవ్ర స్థాయిలో నిరసనలు వ్యక్తం చేస్తున్నాయి ప్రతిపక్షాలు. ఓవైపు మహిళలంతా కలిసి బెల్ట్ షాపులను ఊరి మధ్యలోంచి తరిమి కొడుతున్న వేళ బీర్ ఓ హెల్త్ డ్రింక్ అని పేర్కొనటం సిగ్గు చేటు అని వైసీపీ ఫైర్ బ్రాండ్, ఎమ్మెల్యే రోజా నిప్పులు చెరిగింది.

వైసీపీ కార్యాలయంలో మీడియ సమావేశంలో ఆమె మాట్లాడుతూ... ప్రభుత్వ చర్యలను చూస్తుంటే రానున్న రోజుల్లో విద్యార్థులతో కూడా బీరు తాగించేలా ఉన్నారని ఆమె మండిపడింది. అంతేకాదు అమ్మాయిలను కూడా మందు తాగమనే దౌర్భాగ్య సంస్కృతిని ఈ ప్రభుత్వం అభివృద్ధి చేసినా ఆశ్చర్యపోవాల్సిన అవసరం లేదని విమర్శించింది. స్కూళ్లు, గుళ్ల మధ్య వైన్ షాపులను వైసీపీ అంగీకరించదని, అవసరమైతే ప్రజా పోరాటానికి మద్ధతుగా జైలుకు వెళ్లేందుకు సిద్ధమని ఆమె ప్రకటించింది. ప్రజా సంక్షేమాన్ని గాలికి వదిలేసిన తెలుగుదేశం ప్రభుత్వం... తాగుబోతు ప్రభుత్వంలా మారిందని వైసీపీ ఎమ్మెల్యే రోజా మండిపడ్డారు. జాతీయ రహదారుల పక్కన లిక్కర్ షాపులు ఉండకూడదంటూ సుప్రీంకోర్టు తీర్పును వెలువరించినా ముఖ్యమంత్రి చంద్రబాబు లెక్క చేయడం లేదని... వైన్ షాపుల కోసం జాతీయ రహదారులను రాష్ట్ర రోడ్లుగా డీనోటిఫై చేశారని ఆగ్రహం వ్యక్తం చేశారు.

నీరు-మీరు కార్యక్రమం తరహాలో నీరు-బారు కార్యక్రమాన్ని చేపట్టారని విమర్శించారు. మెడికల్ షాపుల్లో కూడా బీరు అమ్మేలా ఉన్నారని అన్నారు. చంద్రబాబుకు మహిళల ఉసురు తప్పకుండా తగులుతుందని అన్నారు. మద్యం పాలసీని ఏపీ ప్రభుత్వం వెనక్కి తీసుకోవాలని ఆమె డిమాండ్ చేశారు. మరోవైపు ఈ రోజు ఉదయం 3 కోట్ల విలువైన ఎర్రచందనం ను పోలీసులు స్మగ్లర్ల నుంచి స్వాధీనం చేసుకున్న విషయం తెలిసిందే. తమిళనాడుకు చెందిన దుండగులు హెరిటేజ్ వ్యాన్ లో ఎర్రచందనం తరలిస్తూ పట్టుబడ్డారు. దీంతో ఎర్ర చందనాన్ని అమ్మే హెరిటేజ్ ను అభివృద్ధి చేశారా? అంటూ రోజా చంద్రబాబును ప్రశ్నించింది. నారావారిపల్లెలో ఉన్న చంద్రబాబు పొలంలో కూడా ఎర్రచందనం దుంగలు దొరికాయంటూ తీవ్ర స్థాయిలో విమర్శలు చేసిందామె.