కాంగ్రెస్ కు ఆ అవగాహన లేదు : వెంకయ్య

Posted: 09/18/2015 06:51 PM IST

కేంద్ర పట్టణాభివృద్ధి శాఖ మంత్రి వెంకయ్యనాయుడు మరోమారు విపక్ష కాంగ్రెస్ పై విమర్శల వర్షం కురిపించారు. బీజేపీ పార్టీ అధికారంలోకి వచ్చినప్పటికీ కాంగ్రెస్ పై ఆయన నిప్పులు చెరుగుతున్న విషయం తెలిసిందే! కాంగ్రెస్ అధికారంలో వున్నప్పుడు ఆ పార్టీ చేసిన తప్పులు, స్కాములు, ఇతర వ్యవహారాలపై వెంకయ్య చాలా సందర్భాల్లో ఘాటుగా వ్యాఖ్యలు చేశారు. ఇప్పుడు ‘భూసేకరణ’ చట్టంపై కాంగ్రెస్ పార్టీ చేసిన సంచలన వ్యాఖ్యలకు వెంకయ్య తనదైన శైలిలో కౌంటర్లు వేశారు.

ఈ నేపథ్యంలో వెంకయ్య కాంగ్రెస్ పార్టీపై విమర్శలు గుప్పిస్తూ.. గతంలో ఆ పార్టీ చేసిన తప్పులను తమపై రుద్దుతోందని ఘాటుగా స్పందించారు. భూసేకరణ చట్టంపై అనవసర రాద్ధాంతం చేస్తున్న కాంగ్రెస్ నేతలకు అసలు ఆ చట్టంపై అవగాహనే లేదని ఆయన తేల్చిచెప్పారు. కాంగ్రెస్ అధికారంలో వున్నప్పుడు రైతులకు ఎంతో అన్యాయం చేసిందని.. ఆ తప్పులను కప్పిపుచ్చుకునే ఆ పార్టీ నేతలు తమ ప్రభుత్వంపై లేనిపోని నిందలు వేస్తున్నారని ఆయన ధ్వజమెత్తారు. తమ ప్రభుత్వం చేపట్టిన భూసేకరణ చట్టం వల్ల రైతుల కష్టాలు తీరడంతోపాటు మరెన్నో ప్రయోజనాలు కలుగుతాయని అన్నారు. ఎప్పటికైనా వాస్తవాలను ఒప్పుకుని తీరాల్సిందేనని ఆయన వ్యాఖ్యానించారు.

తమ సొంత స్వలాభాల కోసం కాంగ్రెస్ ప్రజలకు ఏమాత్రం పట్టించుకోకుండా ఎన్నో తప్పులు చేసినప్పటికీ.. తమ ప్రభుత్వంపై నిందలు వేస్తున్నందుకు సిగ్గు పడాలని వెంకయ్య అన్నారు. ఈ విధంగా వెంకయ్య చేసిన కామెంట్లపై కాంగ్రెస్ ఏ విధంగా స్పందిస్తుందో వేచి చూడాల్సిందే!