ITEMVIDEOS: ఇదేం అప్రమత్తత బాబోయ్.. అలికిడైతే చాలు జనం పరారు..

Posted: 09/22/2017 04:51 PM IST

ప్రపంచ వ్యాప్త ప్రజలను భయాందోళనకు గురిచేస్తూ రోజుకో చోట జడలు విప్పుతూ అమాయక ప్రజలను పోట్టనబెట్టుకుంటున్న ఉగ్రవాదం.. ఎప్పుడు ఎక్కడ ఎలాంటి అలజడి సృష్టిస్తుందో అర్థంకాని పరిస్థితి ప్రజల్లో నెలకొంది. కాగా, తాజాగా లండన్ సబ్ వే రైలులో ఉగ్రవాదులు అమర్చిన బక్కెట్ బాంబులలో ఒక్కటి పేలగా మరోకదానిని పోలీసులు నిర్వీర్యం చేసిన విషయం పాఠకులకు తెలిసిందే. అయితే లండన్ వాసులు మాత్రం ఇంకా అ బాంబు విస్పోటనం నుంచి బయటపడినట్లు లేదు.

ఇన్నాళ్లు గాంభీరంగా కనిపించిన లండన్ వాసులు బాంబు విస్పోటనంతో ఒక్కసారిగా భయకంపితులయ్యారు. దీంతో ఏ చిన్న అలికిడి అయినా అనుమానంగా చూస్తున్నారు. ఇది ఎక్కడి నుంచి వస్తుంది అని అరా తీయడానికి బదులు తాము ముందుగా దూరంగా వుంటూ చాలునని భావిస్తున్నారు. అసలు అనుమానపడాల్సిన శబ్దమేనా.. లేక కాదా..? అన్న విషయాన్ని కూడా పరిగణలోకి తీసుకోకుండా తమ జాగ్రత్త తాము తీసుకోవడం మంచిదని భావిస్తున్నారు.

ఇంతవరకు బాగానే వున్నా.. అసలు విషయం తెలుసుకోవాల్సిన అవసరం కూడా వారిపై వుంది. అంతేకానీ భయంతో పరుగులు తీసేకొద్ది శబ్దాలు వినిపిస్తూనే వుంటే ఎంత దూరమని పరిగెడతామన్న అలోచనైనా రావాలిగా అంటున్నారు కొందరు. ఇదిలావుంచితే ఇప్పుడెందుకు ఈ విషయాన్ని ప్రస్తావిస్తున్నారు.? అని అంటారా.,? పోలీసుల హెచ్చరికల నేపథ్యంలో సబ్ వే రైలుతో పాటు అన్ని రవాణా మార్గాల్లో ప్రయాణికులు అప్రమత్తంగా వుండాలని హెచ్చరించారు. దీంతో భయాందోళనకు గురవుతున్న ప్రజలు అత్యంత అప్రమత్తను కనబర్చడమే ఇప్పుడు వార్తైంది. అదెలా అంటే..

పిక్కాడిల్లీ నుంచి కాక్ఫస్టర్స్ వెళుతున్న ట్యూబ్ ట్రైన్‌లో ఓ ప్రయాణికుడు రైల్లోకూర్చుని గోళ్లు తీసుకుంటున్నాడు. ఈ స‌మ‌యంలో టిక్.. టిక్.. టిక్‌మంటూ చ‌ప్పుళ్లు రావడంతో ఇత‌ర‌ ప్ర‌యాణికులంతా భ‌య‌ప‌డిపోయారు. అత‌డు కిందికి చూస్తూ ఏదో బాంబు పేల్చేందుకు ప్ర‌య‌త్నిస్తున్నాడ‌ని ప్రయాణికులు అనుకున్నారో ఏమో.. రైల్లో అత‌డికి దూరంగా ప‌రుగులు తీశారు. ఈ విష‌యాన్ని ఆ రైల్లో ప్ర‌యాణించిన ఓ ప్ర‌యాణికుడు గ‌మ‌నించి వీడియో తీశాడు. త‌దుప‌రి స్టేషన్ రాగానే రైల్లోని వారంతా కింద‌కు దిగేశార‌ని ఆయ‌న‌ చెప్పాడు. ఈ వీడియోను సోష‌ల్ మీడియాలో పెట్ట‌డంతో ఈ వార్త అందరికీ తెలిసిపోయింది.