పవన్ ప్రేయసితో చెర్రీ రొమాన్స్

Posted: 02/24/2015 11:24 AM IST

‘తీన్ మార్’ సినిమాలో పవన్ కళ్యాణ్ ప్రేయసిగా నటించిన కృతి కర్బందా... ఆ తర్వాత నటించిన పలు సినిమాలు కూడా ఫ్లాప్ అవడంతో కృతికి తెలుగులో ఆఫర్లే కరువయ్యాయి. ఆ మధ్య మనోజ్ తో ‘మిస్టర్ నూకయ్య’ సినిమాలో నటించినప్పటికీ... ఆ సినిమా విజయం సాధించకపోవడంతో కృతికి అవకాశాలు రాలేకపోయాయి. దీంతో కన్నడ, తమిళ ఇండస్ట్రీలలో అవకాశాలు దక్కించుకునే ప్రయత్నం చేస్తోంది.

తాజాగా ఈ అమ్మడికి మెగా పవర్ స్టార్ రాంచరణ్ సినిమాలో నటించే అవకాశం దక్కింది. రాంచరణ్ హీరోగా ప్రముఖ దర్శకుడు శ్రీనువైట్ల దర్శకత్వంలో ఓ చిత్రం రూపొందనున్న విషయం తెలిసిందే. ప్రస్తుతం ఈ చిత్రానికి సంబంధించిన ప్రీ ప్రొడక్షన్ పనులు జరుగుతున్నాయి. ‘మై నేమ్ ఈజ్ రాజు’ అనే టైటిల్ పరిశీలనలో వుంది.

ఈ చిత్రానికి ప్రముఖ రచయితలు కోనవెంకట్, గోపి మోహన్ లు కలిసి కథ, మాటలు అందిస్తున్నారు. డి.వి.వి. ఎంటర్టైన్మెంట్స్ పతాకంపై ప్రముఖ నిర్మాత డి.వి.వి.దానయ్య నిర్మించనున్నారు. ఇందులో రాంచరణ్ సరసన రకూల్ ప్రీత్ సింగ్ హీరోయిన్ గా నటించనుంది. మరో హీరోయిన్ గా కృతి కర్బందను ఎంపిక చేసినట్లుగా తాజా సమాచారం.

ఇందులో కృతి స్పెషల్ పాత్రలో కనిపించనుంది. ప్రముఖ తమిళ యువ సంగీత దర్శకుడు అనిరుధ్ సంగీతం అందించనున్నారు. మార్చి 5న లాంఛనంగా ప్రారంభం కాబోతుంది. అలాగే మార్చి 16 నుంచి రెగ్యులర్ షూటింగ్ ప్రారంభం కానుంది. ఈ సినిమాను త్వరగా పూర్తి చేసి, అక్టోబర్ 15న విడుదల చేయడానికి సన్నాహాలు చేస్తున్నారు. మరిన్ని వివరాలు మార్చి 5న తెలియనున్నాయి.