హాలీవుడ్ దిగ్గజ దర్శకులు ఒకరికొకరు సాయం

Posted: 07/24/2017 01:08 PM IST

Legendary directors worked for one movie

భారీ ప్రాజెక్టుల నిర్మాణాల పేర్లు చెబితే గుర్తొచ్చేది ఆ ఇద్దరే. అద్భుతమైన కళాఖండాలను అందించారు. టెక్నాలజీని వాడుకోవటంలో వాళ్లను మించిన వాళ్లు లేరనే చెప్పాలి. వాళ్లే స్టీవెన్ స్పీల్‌బ‌ర్గ్‌, జేమ్స్ కామెరూన్ లు. `జురాసిక్ పార్క్‌` `అవ‌తార్‌` లాంటి ప్ర‌తిష్టాత్మ‌క చిత్రాలు తీసిన వీళ్లకు ఎంత క్రేజ్ ఉందో ప్రత్యేకంగా చెప్పాల్సిన పని లేదు. అదే ఈ ఇద్దరూ ఒకే సినిమాకు పని చేస్తే ఎలా ఉంటుంది?

అవును... స్పీల్‌బ‌ర్గ్ నూత‌న చిత్రం `రెడీ ప్లేయ‌ర్ వ‌న్‌` సినిమాలో కామెరూన్ హ్యాండ్ కూడా ఉందంట. ఈ విషయాన్ని సినిమా స్క్రీన్ రైటర్ జాక్ పెన్ తెలిపాడు. మోష‌న్ క్యాప్చ‌ర్ టెక్నాల‌జీ ఎలా ఉప‌యోగించాల‌న్నది కామెరూన్ కు తెలిసినంతగా ఎవరికీ తెలీదు. ఆ విష‌యంలో ఆయన స‌హాయం తీసుకునే స్పీల్ బర్గ్ తెరకెక్కించాడని తెలిపాడు. శాండియాగో కామిక్ కాన్ ప్యానెల్ ఇంట‌ర్వ్యూలో చిత్ర ట్రైల‌ర్ విడుద‌ల త‌ర్వాత ఆయ‌న ఈ విష‌యం చెప్పారు.

పూర్తిగా వీడియోగేమ్ నేప‌థ్యంలో సాగే `రెడీ ప్లేయ‌ర్ వ‌న్` సినిమాలో దాదాపు 80 శాతం చిత్రాన్ని మోష‌న్ క్యాప్చ‌ర్ ద్వారానే చిత్రీకరించటం విశేషం. అంటే సినిమా పేరుకు స్పీల్ బర్గ్ దర్శకుడే అయినప్పటికీ మేజర్ పార్ట్ మొత్తం మాత్రం కామెరూన్ నేతృత్వంలోనే తెరకెక్కిందన్న మాట.